Bwana Rugambage J. Leonard, umwanditsi mukuru w’ikinyamakuru kigenga Umuvugizi, yicishijwe amasasu. Uwamwishe yamutsinze imbere y’iwe. Kugeza ubu uwakoze iryo bara ntaramenyekana. Polisi y’igihugu ivuga ko igikomeje iperereza.
Ubwoba nabwo bukomeje kuba bwinshi mu banyamakuru. Bamwe mu banyamakuru batandukanye bitabiriye umuhango wo kumushyingura, bamaganye icyo gikorwa. Basaba Leta y’u Rwanda ko yakwihutisha iperereza uwakoze iryo shyano agakanirwa urumukwiriye.
Umuyobozi mukuru w’ikinyamakuru Umuvugizi, Gasasira J. Bosco, arashinja ubutegetsi bwo mu Rwanda, ko aribwo bwakoze iryo bara. Avugana n’Ijwi ry’Amerika, yagize ati”ni maneko zo mu Rwanda zamwivuganye biturutse ku nkuru twatangaje igaragaza uburyo arizo zari zigiye kwivugana Gen. Kayumba Nyamwasa”.
Guverinoma y’u Rwanda, yahakanye yivuye inyuma ko ntaho ihuriye n’ubwo bwicanyi. Kuri iyo ivuga ko inzego zibishinzwe zatangiye iperereza, kandi ko yizeye ko uwakoze iryo bara azashyira akamenyekana, agakanirwa urumukwiye.
Imiryango mpuzamahanga itandukanye iharanira uburenganzira bwa muntu n’ubwisanzure bw’itangazamakuru, yamaganye ubwo bwicanyi, inagaragaza ko ubwo bwicanyi bufitanye isano n’amatora y’umukuru w’igihugu yo ku ya 9 z’ukwezi kwa 8 mu mwaka wa 2010.
Umunyamakuru Rugambage J. Leonard yari afite imyaka 38 y’ubukure. Yishwe mu ijoro ryo kuya 24 z’ukwezi kwa 6 mu mwaka wa 2010. Yari umwanditsi mukuru w’ikinyamakuru Umuvugizi, cyahagaritswe na Leta mu gihe cy’amezi 6 kuva kuya 13 z’ukwezi kwa 4 mu mwaka wa 2010. Yasize umugore n’umwana umwe. Imana imuhe iruhuko ridashira.