Uko wahagera

Antonio Guterres Yongewe Manda ya Kabiri yo Gutwara ONU


Umunyamabanga mukuru wa ONU Antonio Guterres

Inama rusange y'Umuryango w'Abibumbye imaze gutorera Antonio Guterres manda ya kabiri, ari nayo ya nyuma, y'imyaka itanu. Ba ambasaderi b'ibihugu byose bigize ONU uko ari 193 bahaye amajwi umunyamabanga mukuru, nta n'umwe uvuyemo, n'amashyi, ibyo bita “acclamation" mu rurimi ry'Igifaransa.

Mbere y'itora gato, perezida w'inteko ishinzwe umutekano ku isi, ambasaderi wa Estonia muri ONU, Sven Jurgenson, yabanje gusoma umwanzuro iyi nteko yakoze, nawo wemejwe n'abayigize bose uko ari 15, usabira Guterres manda ya kabiri.

Antonio Guterres, ukomoka mu gihugu cya Portugal, ni we wari kandida wenyine. Akimara gutorwa yahise arahira, maze avuga n'ijambo. Yasabye abagize Umuryango w'Abibumbye "gukora ibishoboka byose kugirango bakemure ibibazo by'amacakubiri n'umubano urwaye hagati y'ibihugu bikomeye."

Na we ku giti cye yasezeranyije isi ko "azakora atizigamye kugirango icyizere kigaruke hagati y'ibihugu, ibinini n'ibito, no kubaka amateme y'ubwizerane hagati yabyo." Antonio Guterres yatorewe bwa mbere kuba umunyamabanga mukuru wa ONU mu kwezi kwa cumi 2016.

Yatangiye iyi manda arangije ku italiki ya mbere y'ukwa mbere 2017, asimbuye Umunyakoreya y'Epfo, Ban Ki-moon. Mbere yaho, yari umuyobozi mukuru wa HCR imyaka icumi, kuva mu 2005 kugera mu 2015. Yabaye kandi minisitiri w'intebe w'igihugu cye, Portugal, imyaka itandatu n'igice, kuva mu kwa cumi 1995 kugera mu kwa kane 2002.

Facebook Forum

XS
SM
MD
LG