ANC Ishobora Kwegukana Intsinzi mu Matora ya Afurika y'Epfo

Muri Afrika y’Epfo, ibarura ry’amajwi rirerekana ko ishyaka ANC ryizeye intsinzi.

Komisiyo y’amatora y’Afrika y’Epfo iragenda itangaza imbonankubone ibarura ry’amajwi ibiro ku bindi. Amaze gutangazwa araturuka mu biro by’amatora 36% ku ijana ku biro byose hamwe ibihumbi 23. ANC iri imbere n’amajwi 56%. Bivuze ko iri shyaka rishobora kwegukana ubwiganze busesuye mu nteko ishinga amategeko nshya, bityo rikagumana ubutegetsi.

Inteko ishinga amategeko ni nayo ishyiraho umukuru w’igihugu. ANC rero itsinze, Cyril Ramaphosa yatorerwa gukomeza kuyobora igihugu noneho afite manda ye bwite kuko iyo arimo muri iki gihe kuva mu kwezi kwa kabili mu 2018 ari ukurangiza iya Jacob Zuma weguye atarayirangiza. Natorwa azimikwa ku italiki ya 25 y’uku kwezi kwa gatanu.

N’ubwo bimeze gutya, ANC ishobora gusubira inyuma ugereranije n’amatora aheruka mu 2014. Bwo yari yabonye amajwi arenga 62%.

Democratic Alliance, rubanda babona ko ari ishyaka ry’Abazungu, riraza ku mwanya wa kabili n’amajwi y’agateganyo hafi 25%. Naho ishyaka Economic Freedom Fighters rya Julius Malema ni irya gatatu n’amajwi y’agateganyo hafi 9%. Naho ishyaka ry’abahezanguni b’Abazungu Freedom Front Plus riza ku mwanya wa kane n’amajwi y’agateganyo hafi 3%.

Amatora yerekana ko uburemere bw’amashyaka budahinduka urebye uko akurikirana. Arerekana ko abaturage b’Afrika y’Epfo batagishishikajwe na politiki nka mbere. Abagiye gutora ejo bari 65,48% mu gihe abatoye mu 2014 bari 73,48%.