Leta zunze ubumwe z'Amerika yongeye abandi basilikali bo hejuru ku bakoze kudeta muri Myanmar yafatiye ibihano.
Abiyongereye ku rutonde ni Lieutenant-General Moe Myint Tun na General Maung Maung Kyaw, usanzwe ari umugaba w'ingabo za Myanmar zirwanira mu kirere. Bombi bari mu gatsiko kahiritse ubutegetsi bwa rubanda ku itariki ya mbere y'uku kwezi kwa kabiri. Biyongereye ku bandi basirikari bakuru ba Myanmar icumi Leta zunze ubumwe z'Amerika yafatiye ibihano ku italiki ya 11 y'uku kwezi.
Uretse kubima, bo ku giti cyabo, viza zo kuza muri Amerika, ibi bihano birimo no gufunga imari y'igihugu cya Myanmar ingana n'amadolari miliyari imwe iri muri Leta zunze ubumwe z'Amerika.
Mu itangazo yashyize ahagaragara, minisiteri y'imari, ishinzwe kubahiriza ibi bihano, ivuga ko Leta zunze ubumwe z'Amerika izakomeza gushyira hamwe n'abafatanyabikorwa bo mu karere no ku isi kugirango bashyire igitutu ku gisirikari n'igiporisi bya Myanmar kugera igihe bazahagarikira "urugomo rwabo ku baturage b'inzirakarengane, bakora imyigaragambyo mu ituze, no kugirango abasirikari basubizeho demokarasi na leta igendera ku mategeko muri Myanmar."
Leta zunze ubumwe z'Amerika irasaba kandi igisilikali cya Myanmar kurekura infungwa za politiki zose, uhereye ku mukuru wa guverinoma, Aung San Suu Kyi.
Usibye Leta zunze ubumwe z'Amerika, Canada, Ubwongereza, n'Umuryango w’ubumwe bw’ibihugu by’Uburayi nabo bafatiye ibihano agatsiko k'abasirikari bakoze kudeta muri Myanmar.
Facebook Forum