Uko wahagera

Amerika n'Ubushinwa Barashyamiranye Kubera Ikirwa cya Taiwan


Perezida Joe Biden w'Amerika na Xi Jinping w'Ubushinwa

Mu kiganiro Perezida Joe Biden yagiranye ejo kuwa kane n'abaturage cyatambukaga kuri televiziyo CNN, bamubajije niba Leta zunze ubumwe z'Amerika yiteguye kurwanirira Taiwan iramutse itewe n'Ubushinwa. Yarashubije, ati: "Yego. Dufite iyo nshingano."

Avuga kuri aya magambo, umuvugizi wa minisiteri y'ububanyi n'amahanga y'Ubushinwa, Wang Wenbin, yabwiye abanyamakuru uyu munsi ko Leta zunze ubumwe z'Amerika ikwiye "kureka guha Taiwan ubutumwa bwo kuyiyobya."

Yagize, ati: "Ubushinwa ntibuzatezuka na gato igihe ubusugire bw'igihugu n'inyungu zacyo z'ibanze bibangamiwe, kandi nta n'umwe ukwiye kwibeshya ko budafite ubushake budakuka bwo kubirengera."

Wang Wenbin yongeye gushimangira ko Taiwan ari intara y'Ubushinwa ku buryo budasubirwaho.

Muri iyi minsi, hari urunturuntu mu kigobe cya Taiwan. Ubushinwa bugenda bwohereza indege z'intambara nyinshi kurushaho kuzengurukayo. Nko hagati y'italiki ya mbere n'iya gatatu z'uku kwezi, Ubushinwa bwoherejeyo indege 149. Taiwan ivuga ko ari ukuyivogera, kandi ko Ubushinwa bugamije kuyigarurira bukoresheje ingufu za gisilikare. Leta y'Ubushinwa nayo ivuga ko ifite ubushake bwo kwigarurira Taiwan ikoresheje uburyo bwose bushoboka.

Ubushinwa na Taiwan batandukanye mu 1949 nyuma y'intambara y'isubiranamo ry'abanegihugu. Leta zunze ubumwe z'Amerika yacanye umubano ushingiye kuri z'ambasade mu 1979, iwutangirana ahubwo n'Ubushinwa.

Kuva icyo gihe, ikurikiza politiki idasobanura niba Taiwan ari iy'Ubushinwa cyangwa se niba igomba kwigenga. Ariko ifite itegeko rivuga ko "igomba gukora ibishoboka byose kugirango Taiwan ibashe kwirengera yo ubwayo" no "gufata nk'impungenge zikomeye" ubushotoranyi bwose bwayikorerwaho.

Facebook Forum

XS
SM
MD
LG