Moderna yagerageje urukingo rwayo isanga rukora ku kigero cya 94,1%. Ni hejuru cyane y'ikigero cya 50% cyagenwe ubusanzwe n'ikigo cya Leta zunze ubumwe z'Amerika gishinzwe ubuziranenge bw'ibiribwa n'imiti, FDA mu magambo ahinnye y'Icyongereza. Iki kigo ni nacyo gitanga impushya zo gucuruza imiti n'inkingo.
Moderna yasanze kandi urukimgo rwayo rukumira virusi ya Corona gukaza ubukana bwayo ku bantu bose, 100%, yarugeragejeho. Kubera izi mpamvu zose, Moderna irasaba uyu munsi Leta zunze ubumwe z'Amerika n'Ubulayi gutangira kurutanga muri uku kwezi kwa 12 kuzatangira ejo kuwa kabiri.
Moderna ibaye iya kabiri isaba gutangira gucuruza urukingo rwa Covid-19 nyuma y'ikindi kigo gikora imiti Pfizer nacyo cyo muri Leta zunze ubumwe z'Amerika mu cyumweru gishize. Pfizer yavuze ko urukingo rwayo rukora ku kigero cya 95%.
Umuyobozi w'imilimo yo gukora urukingo ya Moderna, Dr. Tal Zaks, yatangaje mu kiganiro yagiranye kuri telefoni n'abanyamakuru, ko bamaze kubona uruhushya rwo muri Leta zunze ubumwe z'Amerika no mu Bulayi, bashobora kurugeza no mu bindi bice by'isi guhera byibura mu gihembwe cya mbere cy'umwaka utaha w'2021.
Kuva imaze kwaduka mu Bushinwa mu kwa 12 mu 2019, virusi ya Corona imaze guhitana abantu barenga miliyoni imwe n'ibihumbi 460 kw'isi yose. Leta zunze ubumwe z'Amerika iza kw'isonga n'abantu barenga ibihumbi 270 na 500 Covid-19 imaze kwica, nk'uko imibare ya kaminuza Johns Hopkins yo muri Amerika ibigaragaza.
Facebook Forum