Uko wahagera

Amerika Iraburira Ababangamira Amatora Muri Afurika


Sekereteri w'ububanyi n'amahanga wa Leta zunze ubumwe z'Amerika, Mike Pompeo, mu kiganiro kigenewe abanyamakuru taliki 21 z'ukwa cyanda 2020

Leta zunze ubumwe z’Amerika iraburira ibihugu by’Afurika ku kibazo cyo gutegura no gukoresha amatora, ari na yo demokarasi ishingiyeho.

Ni mu itangazo ryasohowe n'ibiro by'Umuvugizi wa Leta y'Amerika ryashyizweho umukono na Sekereteri wa Leta ushinzwe ububanyi n'amahanga, Mike Pompeo, rigenewe ibihugu by'Afurika byitegura amatora mu minsi iri imbere.

Iryo tangazo riravuga ko Amerika ishyigikiye amatora n'inzira ya demokarasi muri Afurika, rigashimangira ko igitugu n'iterabwoba nta mwanya bifite mu nzira ya demokarasi. Amerika irongera gushimangira ko uburenganzira bwo kwishyira hamwe no kutaniganwa ijambo ari inkingi ikomeye ya demokarasi.

Iryo tangazo ryasohotse kuri uyu wa kane nta gihugu runaka cyo muri Afurika rivuga, rirareba umugabane wose. Ririhanangiriza uwo ari we wese washaka kuvangira ibikorwa by'amatora muri Afurika n'inzira ya demokarasi iyashingiyeho.

Amerika iravuga ko itazazuyaza gufatira ibihano - birimo kwimwa visa - abo bizagaragara ko bafite uruhare mu bikorwa byo guteza imvururu zishingiye ku matora.

Risoza rivuga ko Amerika ari umufatanyabikorwa w'Afurika w'igihe kirekire kandi ko yiyemeje imikoranire myiza ku rwego rw'umugabane no ku rwego mpuzamahanga.

Facebook Forum

XS
SM
MD
LG