Perezida Joe Biden wa Leta zunze ubumwe z'Amerika yemeye kongera umubare w'abahabwa ubuhungiro muri Amerika nyuma y'aho bamwe mu ba Democrate bakomeye banengeye icyemezo yari yafashe cyo kudahindura umubare wari usanzweho.
Ibiro bya Presidansi y'Amerika byatangaje ko italiki 15 z'ukwezi kwa gatanu aribwo Perezida Joe Biden azatangaza umubare mushya uruta uwari usanzwe.
Ejo ku wa gatanu yari yasinye itegeko rigumusha ho umubare wa 15,000 by'abemerewe guhabwa ubuhungiro mu mwaka wa 2021. Uwo mubare wari warashyizweho na Donald Trump wahoze ari perezida w'Amerika.
Gusa Perezida Biden yari yavuze ko bibaye ngombwa ko hari igihinduka kuri uwo mubare, hakoreshwa ububasha umukuru w'igihugu ahabwa n'itegeko kuwongera.
Iryo teka kandi ryari ryahinduye n'umubare wemerewe buri mugabane wo ku isi. Ryari ryagenny kwakira impunzi 7000 ziva muri Afurika, 3000 muri Amerika y'amajyepfo, 1500 zivuye mu Bulayi, 1500 zivuye mu burasirazuba bwo hagati, na 1000 zivuye muri aziya y'iburasirazuba. Indi myanya 1000 yagombaga gusaranganywa hakurikijwe uko ikenewe.
Ariko nyuma y'aho iki cyemezo kinengewe n'Abademocrate bakomeye, Perezida Biden yemeye kugihindura hagati mu kwezi gutaha.
Facebook Forum