Uko wahagera

Amerika: Abadepite Barashyikiriza Sena Ikirego Kuri Trump Wahoze ari Perezida


Umutwe w'Abadepite w'inteko ishinga amategeko ya Leta zunze ubumwe z'Amerika, Congress, uratangaza ko ugeza uyu munsi ku mugaragaro kuri Sena ikirego cyawo ku wari umukuru w'igihugu Donald Trump.

Abadepite ba Congress bemeje ikirego mu cyumweru gishize. Barega Trump icyaha kimwe cyo gushishikariza rubanda kwigomeka ku nzego z'ubutegetsi. Kuri bo, Trump ari inyuma y'igitero cy'abayoboke be kuri Capitol, ingoro y'inteko ishinga amategeko y'Amerika, ku italiki ya 6 y'uku kwezi kwa mbere, cyaguyemo abantu batandatu.

Abasenateri b'Abarepubulikani n'ab'Abademokrate bumvikanye ko badahita batangira kuburanisha ikirego bakimara kukigezwaho kugira ngo bahe abashinjacyaha b'Abadepite n'abavoka ba Trump igihe gihagije cyo kwitegura. Bityo, bavuga ko urubanza ruzatangira mu cyumweru kizahera kuwa mbere taliki ya 8 y'ukwezi kwa kabiri gutaha.

Sena iramutse ihamije icyaha Trump, ishobora gukora indi nama itakiri urukiko, noneho igatora umwanzuro umuhanisha kutazongera gukora ukundi imirimo inyura mu itora ry'abaturage ku rwego rw'igihugu.

Kugira ngo Sena ihamye icyaha Trump igomba kubyemeza n'amajwi ya 2/3, ni ukuvuga byibura abasenateri 67 ku ijana bayigize. Muri iki gihe, Sena ya Leta zunze ubumwe z'Amerika irimo Abademokarate 50 n'Abarepubulikani 50. Kugirango ihamye Perezida Trump icyaha aregwa, byasaba ko byibura Abarepubulikani 17 bifatanya n'Abademokarate bose.

Naho kugirango imubuze kuzongera kwiyamamaza ukundi byo bisaba ubwiganze bworoheje bw'amajwi 50 ku ijana wongeyeho rimwe, ni ukuvuga Abasenateri 51 gusa.

Facebook Forum

XS
SM
MD
LG