Uko wahagera

Afurka y'Epfo: Ishyaka ANC Rirasaba Abashinjwa Ruswa Kwegura ku Milimo


Abayoboke b'Ishyaka ANC

Mu itangazo rwashyize ahagaragara, urwego rushinzwe gukurikirana uko ibyemezo by'ishyaka bishyirwa mu bikorwa, National Working Committee, rwemeje ko abantu bose baregwa ruswa bagomba kwegura bitarenze iminsi 30, bitabaye ibyo bagahagarikwa ku milimo yabo by'agateganyo.

Rwavuze ko ANC igomba kubandikira amabaruwa abibasobanurira neza, kandi anabamenyesha uko bagomba kwitwara mu gihe bazaba barahagaritswe mu kazi.

Mu kwezi kwa munani gushize ni bwo ANC yafashe icyemezo ko abayoboke bayo baregwa ruswa bagomba kwegura. Mu mpera z'ukwezi kwa gatatu gushize, ANC noneho yabahaye igihe ntarengwa cy'iminsi 30, cyangwa se bakeguzwa ku gahato. Mu bo ANC yasabye kwegura, harimo umunyamabanga mukuru wayo, Ace Magashule.

Mu kwezi kwa 11 gushize, yatawe muri yombi aregwa ibyaha bya ruswa no kunyereza umutungo w'abaturage, aza gutanga ingwate y'ama-Rand 200,000 (ifaranga rikoreshwa muri Afrika y'Epfo), ni ukuvuga amadolari ibihumbi 14, kugirango aburane ari hanze. Urubanza rwe mu mizi yarwo ruteganyijwe mu kwezi kwa munani gutaha. Ariko yanze kwegura.

Kuva amaze kugera ku butegetsi mu 2018, perezida w'Afrika y'Epfo, Cyril Ramaphosa, ari nawe perezida wa ANC kuva mu 2017, yashyize ku murongo wa mbere urugamba rwo kurwanya ruswa mu ishyaka rye no muri guverinoma, nyuma y'ubutegetsi bw'uwo yasimbuye Jacob Zuma bwari bwaramunzwe na ruswa.

Facebook Forum

XS
SM
MD
LG