Ibihugu by’Afurika bikomeje gufata ingamba zikaze zijyanye no kwitegura guhangana na virusi ya Corona ubu izwi COVID-19, igihe yaba igeze kuri uwo mugabane.
Ikigo nyafurika gishizwe kurwanya no gukumira indwara Africa CDC kivuga ko iyo virusi niramuka igeze muri Afurika ishobora kuzahitana abantu benshi.
Mu kiganiro n’abanyamakuru I Addis Ababa muri Etiyopiya, umuyobozi w’icyo kigo John Nkengasong yavuze ko ibihugu bitandukanye byafashe ingamba zirimo gupima abantu ku bibuga by’indege, kubaka za labaratoire zifite ubushobozi bwo gupima iyo ndwara no guhugura abakozi b’ubuzima.
Yavuze ko ibihugu 16 by’Afurika ubu bifite ubushobozi bwo gupima iyo ndwara. Yagaragaje ko bifuza ko mbere yuko uku kwezi kurangira, ibindi bihugu 20 bizaba bifite ubwo bushobozi.
Nubwo nta makuru afatika arabyemeza, bwana Nkengasong yavuze ko bishoboka ko iyo ndwara ishobora kuba yarageze ku mugabane w’Afurika.
Hari ibihugu bimaze gutangaza ko hari abantu bikeka ko banduye iyo ndwara ariko nyuma ibizami bikaragaza ko atari byo.
Facebook Forum