Covid 19 irimo iriyongera cyane mu Buhinde. Afrika ifite impungenge cyane ku byayigiraho ingaruka.
Kuri uyu wa kane, umubare w'abandura Covid 19 ku munsi warenze miliyoni 18 mu Buhinde. Naho abapfa buri munsi barenze 3,600.
Minisitiri w'ububanyi n'amahanga, Harsh Vardhan Shringla, yatangaje ko bakeneye cyane cyane umwuka wa Oxygene wo gufasha abarwayi guhumeka. Avuga ko ibihugu 40 byo ku isi byemeye kubibafashamo. Muri byo harimo Leta zunze ubumwe z'Amerika yohereje imfashanyo z'agaciro k'amadolari arenga miliyoni ijana.
Dr. John Nkengasong, umuyobozi w'ikigo cy'Afurika gishinzwe kurwanya no gukumira indwara, Africa CDC, yatangarije abanyamakuru uyu munsi ko ibibera mu Buhinde byamurenze. Yavuze ko Afurika ikwiye kwitegura cyane hakiri kare kuko nayo ishobora kugira ingorane zimwe n'iz'Ubuhinde.
Dr. Nkengasong yagize, ati: "Abaturage b'Afurika bajya kungana n'ab'Ubihinde. Inzego z'ubuganga z'Afurika nazo zifite intege nke. Nta bakozi bahagije bazirimo. Oxygene iri muri Afrika naho ntihagije."
Ku birebana n'inkingo kandi, Afurika igendera ku Buhinde cyane. AstraZeneca ikoreshwa muri Afrika ikorerwa mu Buhinde. Igera muri Afurika inyuze muri Covax, gahunda ya OMS, ishami ry'Umuryango w'Abibumbye ryita ku buzima, yo guha ku buntu inkingo za Covid mu bihugu 92 bikennye. Nkengasong, ati: "Simbona ukuntu Ubuhindi bwakohereza inkingo mu mahanga niba nabwo budashoboye kwihaza."
Kugeza ubu, inkingo miliyoni 17 ni zo zonyine zimaze guhabwa abaturage b'Afrika ku bantu miliyari na miliyoni 300 bayituye.
Facebook Forum