Umutwe w'Abatalibani muri Afuganistani watangaje ko ugiye kurekura ingabo za leta wari usigaranye. Umuvugizi w'umutwe w'Abatalibani, Suhail Shaheen, yabitangarije i Doha muri Qatar ku cyicaro gikuru cy'uwo mutwe. Byari nyuma y'umunsi umwe gusa Perezida Ashraf Ghani wa Afuganistani avuze ko na we azarekura abarwanyi 5000 b'Abatalibani bari mu maboko y'ingabo abereye umugaba. Yandika ku rubuga rwe rwa Twitter, Suhail Shaheen yavuze ko ingabo 1000 za Leta bafite bazazirekura mbere y'ikiruhuko cy'Abayisilamu cya Eid al-Adha, avuga ko bigamije kwerekana ubushake bwo gukora neza.
Impande zombi kandi zemeranyije guhagarika imirwano mu gihe cy'iminsi itatu y'ikiruhuko cya Eid al-Adha. Ejo kuwa Gatatu intumwa idasanzwe ya Leta zunze ubumwe z'Amerika ishinzwe ubwiyunge bw'Abanyafuganistani, Zalmay Khalilzad, yahuye n'abategetsi ba leta y'icyo gihugu i Kabul mu murwa mukuru baganira kuri icyo kibazo.
Kugeza ubu, ibikorwa ku ruhande rw'Abatalibani no ku ruhande rwa leta biragaragaza ko imishyikirano hagati yabo iteganijwe mu cyumweru kimwe ishoboka nk’uko babyiyemereza ubwabo. Gusa haracyari igihe cyo kureba niba koko izaba.
Facebook Forum