Uko wahagera

Kameruni: Abavuzi Gakondo Babonye Isoko Ridasanzwe rya Covid-19


Inama y'abavuzi gakondo

Abavuzi gakondo muri Kameruni bafite ikibazo cy’umubare munini w’abantu babagana bashaka umuti wo kwirinda cyangwa kuvura virusi ya corona. Uko gusibanira ku bavuzi gakondo, bije nyuma y’uko igihugu cya Centrafurika cyemeje ko gifite abantu barenga 2 500 barwaye COVID-19 na 121 bishwe n’iyo ndwara. Cyakora abaganga babyigiye barasaba ubushishozi mu gukoresha iyo miti ya gakondo.

N’ubwo nta bushakashatsi bwakozwe ngo bwemeze uwo muti, Dewah avuga ko umuti we ushobora kuvura ibimenyetso byose bya COVID-19 yemwe ko ushobora no kurengera ubuzima bw’umurwayi ntapfe.

Abaganga bakora ubushakashatsi na guverinema ya Kameruni, basabye abarwayi kutishingikiriza ku muti wa gakondo mu bijyanye na COVID-10. Ahubwo begere ibitaro.

Umuhanga mu by’imiti mu mujyi wa Douala, Merilyne Peyou, yibutsa ko abanyakameruni benshi badatuye hafi y’ibitaro. Ariko ko biboroheye kubona ubuvuzi gakondo.

Ishami rya minisiteri rishinzwe ubuzima bw’abaturage muri Kameruni ryasohoye itangazo kuwa kane w’icyumweru gishize riburira rubanda ku bavuga ko bavura COVID-19, bashaka kunyunyuza imitsi y’abaturage bababaye cyangwa bafite ubwoba bwa Virusi ya corona.

Peyu avuga ko imiti myinshi, igurishwa mu bitaro no mu mafarumasi muri Afurika, ituruka ku byatsi n’amababi y’ibiti byakoreshejwe neza mu kuvura abanyafurika mbere y’uko ubuvuzi bwa none buhagera. Avuga ko ikibazo imiti yo muri Afurika ihura nacyo, ari uburyo bwo kuyibika, ishobora kuba yakwangirika ikagira ingaruka mu mubiri w’umuntu. Kandi ko abavuzi gakondo akenshi baba batazi igipimo cy’umuti bagenera umurwayi.

Dianne Sop, umuvuzi gakondo wo mu mujyi wa Yaounde, avuga ko mu kwezi gushize nawe yakiriye abarwayi 200 baje gushaka umuti wa virusi ya corona. We avuga ko ejo kuwa kabiri mu gitondo, yavuye abarwayi 10. Ariko ko abandi byabaye ngombwa ko abasubiza inyuma kubera ko agitegereje undi muti.

Gidiun Peliegho, umushakashatsi ku buvuzi gakondo muri Afurika, avuga ko abategetsi bakwiye kumenya ari ibihe byatsi bishobora kuvura COVID-19 hanyuma bagafasha gukora umuti.

Agira ati: “Dukeneye inkunga itwongerera intege hamwe n’iy’amafaranga. Iki si igihe cyo gukomeza gushidikanya ibyo umuti gakondo nyafurika ushobora gukora. Ikidushishikaje ubu twe ahanini ni abatuye isi bababaye”.

Ishami rya ONU ryita ku buzima OMS, ryumvikanisha ko ibikoreshwa mu kuvura COVID-19 bitakozweho ubushakashatsi bwimbitse bishobora guteza akaga.

Mu itangazo ryo kw’italiki ya 4 y’uku kwezi kwa gatanu, OMS, yavuze ko imiti itageragejwe kandi itaremejwe, itanga icyizere cya nyirarureshwa bigatuma abantu barangara bakibagirwa ingamba zafashwe nko gukaraba intoki no gusiga intera hagati yabo.

Dewah umuvuzi gakondo, utarashatse ko irindi zina rye ritangazwa, avuga ko amavuriro ye mu mpande zose za Kameruni, abarwayi bakubita bakuzura kuva mu kwezi kwa gatatu ubwo icyorezo cya virusi ya corona cyadutse.

Avuga ko mu mezi abiri ashize, yakiriye byibura abantu 800 bo muri Kameruni, abo muri Repubulika ya Centrafurika n’abo muri Cadi. Bavuga ko bihutira gushaka uwo muti kubera ko babwiwe ko nta muti wa kizungu uvura COVID-19.

Dewa avuga ko abashaka uwo muti akura mu bimera mw’ishyamba, ari benshi cyane ku buryo wamubanye muke, akabura uwo avurisha bamwe mu barwayi.

Facebook Forum

XS
SM
MD
LG