Uko wahagera

Abatsinze Hitler Baribuka Abasirikare Babo Baguye ku Rugamba


Prezida w'Ubufaransa Emmanuel Macron na Mugenzi wa Amerika Donald Trump

D-Day imaze imyaka 75. Ku italiki ya 6 y’ukwa gatandatu mu 1944, ingabo z’ibihuhugu byishyize hamwe kugirango bihashye Hitler zagabye igitero simusiga, zambukiye ku micanga yo ku nyanja mu ntara ya Normandie mu Bufaransa.

Perezida wa Leta zunze ubumwe z’Amerika, Donald Trump, na mugenzi we w’Ubufaransa, Emmanuel Macron, bari kumwe mu muhango wo kwibuka ahitwa Omaha Beach, mu karere ka Colleville-sur-Mer, mu burengerazuba bw’amajyaruguru y’Ubufaransa, mu irimbi ry’abasilikali b’Abanyamerika barenga ibihumbi icyenda bakiguyemo.

Mu bantu bitabiriye uyu muhango hari abakambwe b’Abanyamerika bari mu gitero cyo ku italiki ya 6 y’ukwa gatandatu mu 1944. Perezida Macron yababwiye mu Cyongereza, ati: “Mwe ba sekombata, tuzi neza icyo mwatuzaniye: ubwigenge. Mu izina ry’igihugu cyanjye, nagirango mbabwire gusa ngo turabashimira.” Yabambitse unudali w’icyubahiro usumba iyindi mu Bufaransa witwa “Légion d'Honneur.”

Naho Perezida Trump yababwiye, ati: “Muri ishema ry’igihugu cyacu.” Yavuze amazina ya bamwe mu babaye ibitambo byo kubohora Ubulayi, bituma aba bakambwe bari hafi kuzuza imyaka ijana y’amavuko basesa amarira.

Mbere y’uyu muhango, perezida w’Ubufaransa yari yifatanyije na minisitiri w’intebe w’Ubwongereza, Theresa May, mu wundi muhango wo kwibuka abasilikali b’Abongereza. Bashyize ibuye ry’ifatizo ahazubakwa urwibutso rwabo mu karere ka Ver-sur-Mer.

Minisitiri w’intebe wa Canada, Justin Trudeau, nawe yayoboye umuhango wo kwibuka abasilikali b’igihugu cye bapfuye mu mirwano ya D-Day ahitwa Juno Beach, muri Normandie.

Facebook Forum

XS
SM
MD
LG