Ba minisitiri b'ububanyi n'amahanga b'ibihugu 20 bya mbere bikize ku isi bita G-20 barateraniye mu Butaliyani. Icyorezo cya Covid-19 kiri ku murongo wa mbere w'ibyo biga.
Inama irarebera hamwe cyane cyane uburyo amahanga yose yashyira hamwe mu ngamba zo kurwanya Covid-19, by'umwihariko uburyo bwo gusangira inkingo. Abahanga bemeza ko isi idashobora guhashya iki cyorezo mu gihe igice kinini cy’abaturage bayo batarakingirwa. Covid-19 imaze guhitana abantu bagera kuri miliyoni enye ku isi yose.
Mu ijambo yavuze afungura inama, minisitiri w'ububanyi n'amahanga w'Ubutaliyani, Luigi Di Maio, yavuze ko "muri iyi si yabaye nk'umudugudu, gufatanya twese hamwe ari cyo gisubizo." Mugenzi we wa Leta zunze ubumwe z'Amerika, Antony Blinken, nawe yateye mu rye. Ati: "Kurandura iki cyorezo biradusaba gutanga inkingo nyinshi n'ahantu henshi." Yaboneyeho kwibutsa umugambi w'igihugu cye wo gushyira inkingo miliyoni 580 muri Covax, gahunda y'Umuryango w'Abibumbye yo kugeza ku buntu inkingo za Covid mu bihugu 92 bikennye.
Ba minisitiri ba G-20 bariga kandi no ku kibazo cy'iterambere muri Afrika, n'amahirwe y'urubyiruko n'abategarugoli. Bityo, bwa mbere G-20 yashingwa mu 1999, inama yatumiye ba minisitiri b'ibihugu byayo bashinzwe iterambere mpuzamahanga.
Iyi nkuru twayifatanyije n'ikigo ntaramakuru AP cyo muri Amerika.
Facebook Forum