Abarwanyi ba Kisilamu Bakajije Umurego Bagaba Ibitero muri Siriya

Ibiro ntaramakuru byo muri Siriya byatangaje ko abasirikare babiri ba leta bishwe mu gitero cyagabwe n'abarwanyi bashyigikiye leta ya Kisilamu (IS) hafi y'umujyi wa Palmyra uri hagati muri icyo gihugu.

Amakuru agaragara mu bitangazamakuru byo muri Siriya arememeza ko muri iyi minsi abo barwanyi bakajije umurego bagaba ibitero ku ngabo za leta. Ayo makuru yemeza ko hari hashize iminsi ibiri abarwanyi bashyigikiye leta ya Kisilamu bagabye ikindi gitero mu burasirazuba bwa Siriya; cyaguyemo abasirikare barindwi ba leta n'abarwanyi bashyigikiwe na Irani

Abarwanyi ba kisilamu bakomeje kugaba ibitero bikomeye ku batavuga rumwe na bo muri Siriya na Iraki n'ubwo batakaje igice kinini cy'aho bari barigaruriye. Biganje mu bice byo mu butayu bwa Badia muri Siriya ahagenzurwa n'ingabo za leta, n'abarwanyi bashyigikiwe na Irani n'Uburusiya.

Mu rwego rwo kwihimura ku barwanyi ba Kisilamu, indege z'intambara z'Uburusiya ku wa mbere zagabye ibitero 15 ahakekwa kuba indiri y'abarwanyi ba Kisilamu nkuko byemezwa na Siriya.