Muri Leta zunze ubumwe z'Amerika, urukiko rukuru rwa rubanda, Grand Jury, rwahaye uruhushya umushinjacyaha wo mu rwego rw'igihugu rwo gukurikirana abapolisi bane mu rupfu rwa George Floyd.
George Floyd yishwe n'umupolisi w'Umuzungu Derek Chauvin ku italiki ya 25 y'ukwa gatanu k'umwaka ushize i Minneapolis, umujyi wa mbere munini wa leta ya Minnesota, iri mu majyaruguru y'uburengerazuba bwo hagati muri Leta zunze ubumwe z'Amerika.
Mu kwezi gushize, urukiko rwa rubanda, Jury, rwa leta ya Minnesota rwahamije Chauvin ibyaha by'ubuhotozi. Umucamanza azamubwira igihano cye mu kwezi kwezi gutaha kwa gatandatu. Amategeko ya leta ya Minnesota avuga ko ashobora gukatirwa igifungo gishobora kugera ku myaka 15.
Mu gihe yicaga Floyd, Chauvin yari kumwe mu kazi n'abandi bapolisi batatu, Thomas Lane, Alexander Kueng na Tou Thao. Nabo bategereje kuburanishwa ukwabo mu butabera bwa leta ya Minnesota mu kwezi kwa munani gutaha. Aba bapolisi bose uko ari bane birukanwe mu kazi. Ibyabo rero bifashe indi ntera kuko n'ubutabera bwo mu rwego rw'igihugu cyose cya Leta zunze ubumwe z'Amerika, Justice Fédérale mu Gifaransa.
Urukiko rukuru rwa rubanda, Grand Jury, narwo rwicaye mu mujyi wa Minneapolis, uyu munsi rwemeje ko bakurikiranwa ku byaha byo guhonyanga ku bushake uburenganzira bwo kwidegembya
n'uburenganzira mbonezamubano bw'ibanze, droits civils mu Gifaransa, bw'umuturage Floyd bwanditse mu itegeko nshinga. Abahanga mu by'amategeko bavuga ko bene ibi byaha ku burenganzira mbonezamubano bihanishwa igifungo cya burundu, cyangwa kwicwa. Ariko, bati: "Akenshi ntibijya bigera kuri uru rwego." Ibyaha biramutse bihamye aba bapolisi bane bashobora guhabwa igihano kitaremereye bene aka kageni.
Facebook Forum