Uko wahagera

Abandura Covid-19 Muri Uganda Bariyongera Bidasanzwe


Umukozi ushinzwe iby'ubuzima muri Uganda apima Virusi ya Corona umwe mu batwara amakamyo. Aha ni ku mupaka wa Malaba icyo gihugu gihana na Kenya
Umukozi ushinzwe iby'ubuzima muri Uganda apima Virusi ya Corona umwe mu batwara amakamyo. Aha ni ku mupaka wa Malaba icyo gihugu gihana na Kenya

Mu ngamba Leta ya Uganda itekereza gushyira mu bikora, harimo kuba yasubizaho amabwiriza ya 'guma mu rugo'.

Abantu bandura Virusi ya Corona muri Uganda biyongera ku muvuduko udasanzwe. Ministeri y'ubuzima muri icyo gihugu iravuga ko abarenga 1000 banduye mu minsi itatu ishize. Ni wo mubare munini w'abanduye ugaragaye kuva icyorezo cya COVID 19 cyaduka muri Uganda mu mezi icyenda ashize.

Leta ivuga ko abandura muri iki gihe biganjemo abari hejuru y'imyaka 60. Ibyo bitandukanye n'uko byatangiye bimeze ikiza cya Covid 19 kicyaduka. Joyce Kaducyu wungirije Ministri w'Ubuzima muri Uganda avuga ko ushingiye k'uko bihagaze muri iki gihe umubare w'abahitanwa na Covid 19 mu gihugu ushobora kwiyongera mu minsi iri imbere.

Imibare itangazwa na ministeri y'ubuzima ya Uganda yerekana ko ibipimo byakozwe ku itariki ya gatandatu uku kwezi, abantu 701 ari bo basanganywe iyi viruis. Ibipimo byasohotse uyu munsi byagaragaje abantu 660 banduye. Bivuze ko abasaga 1300 banduye mu minsi ibiri gusa. Uyu nniwo mubare munini w'abanduye mu gihe gito ugaragaye kuba iki kiza cyaduka

Ministiri w'ubuzima wungirije yavuze ko Leta itegura izindi ngamba zo kwirinda iki cyorezo. Abona ko umurego ugaragara mu ikwirakwira rya Covid 19 muri iki gihe ushobora kuba uterwa n’ibikorwa bya politike byo kwiyamamaza biri mu gihugu. Mu ngamba Leta itekerezaho, harimo kuba yasubizaho amabwiriza ya 'guma mu rugo'.

Ni muri urwo rwego leta ivuga ko bimwe mu bikorwa bya politike leta ivuga ko bihurirwamo n'abantu benshi bikomeje bihagarikwa. Abanyapolitike batavuga rumwe na Leta Robert Kyagulanyi w'ishyaka rya NUP na Patrick Amriat w'ishyaka FDC, baheruka gufatwa na polisi ibarega kurenga ku mabwiriza yo kwirinda iki cyorezo kubera ko bakoreshaga inama zihurirwamo n'abantu benshi kandi akanama gashinzwe amatora karategetsi ko batagomba kurenza abantu 200 bahuriye mu nama.

Icyakora mbere mbere y'uko kwiyamamaza bitangira, bamwe mu batavuga rumwe n'ubutegetsi bari basabye ko amatora asubikwa kugeza icyorezo cya Covid 19 kigabanutse. Bavugaga ko bigoye kubuza abaturage kwitabira inama zo kwiyamamaza. Gusa leta ntabwo yumvise ubusabe bwabo.

Perezida Museveni we aherutse guhumuriza abaturage avuga ko kuba umubare wabarimo kwicwa niki cyorezo ukiri ku rugero rwo hasi bivuze ko ubutegetsi bugihagaze neza mu kurwanya Covid 19.

Ministeri y'ubuzima muri Uganda yongeye gusaba abantu kwirinda kugabanya ingendo zitari ngombwa cyane cyane mu mujyi wa Kampala, ahakunze kugaragara umubare munini w'abandura ugereranije n'utundi duce two mu gihugu.

Ubusanzwe, umubare munini w'abantu batuye Kampala no mu yindi mijyi basubira mu byaro aho bavuka kubana n’imiryngo yabo mu bihe by’imisi mikuru ya Noheri n'Umwaka Mushya, ariko Leta irasaba ko abantu bitondera gukora ingendo ziva mu mujyi zijya mu byaro cyane cyane mu gihe cy'iminsi mikuru kuko bashobora kugenda bajyanye icyo cyorezo.

Ministeri y'ubuzima muri Uganda itangaza ko kuva iki cyorezo cyaduka muri icyo gihugu mu kwa Gatatu uyu mwaka, hamaze gupimwa abantu 632,000. Muri abo 24,000 basanganywe Covid 19. Abagera ku 10,000 baravuwe barakira. Abantu 207 ni bo bahitanywe n'iyo ndwara.

Facebook Forum

XS
SM
MD
LG