Uko wahagera

Abandura Covid 19 Bakomeje Kwiyongera ku Isi


Abakozi b'ubuvuzi bakira abarwayi ba Covid 19 mu mu mujyi wa Huston, Leta ya Texas muri Amerika Taliki ya 31/12/2020
Abakozi b'ubuvuzi bakira abarwayi ba Covid 19 mu mu mujyi wa Huston, Leta ya Texas muri Amerika Taliki ya 31/12/2020

Iki kibazo cyatumye Ubwongereza busubira muri gahunda ya "guma mu rugo" ndetse ibihugu birenga 40 bihagarika ingendo zijya muri icyo gihugu.

Ikigo cy'ubushakashatsi cya Johns Hopkins kuri uyu wa gatandatu cyatangaje ko hari abantu barenga miliyoni 84 barwaye Covid-19. Leta zunze ubumwe z'Amerika ikomeje kuza ku isonga mu kugira umubare munini w'abanduye iyo ndwara. Ibarurwa mo abagera kuri miliyoni 20 bayanduye. Ubuhinde buza ku mwanya wa kabiri bubarurwamo abarenga miliyoni 10; hagakurikiraho Brezil ibarurwa mo miliyoni 7.7

Kubera umubare w'abantu benshi bakomeje kwandura ubwoko bushya bwa virusi ya Corona, abakozi b'ubuvuzi mu Bwongereza bararwana no kongera gufungura amavuriro yari yubatswe mu ikubitiro icyorezo kicyaduka.

Ku wa gatanu, Ubwongereza bwabaruraga abantu 53,285 bashya banduye virusi ya Corona. Umunsi ubanziriza uwo hari handuye 55,892. Ni umunsi wa kane abanduye virusi ya Corona barenga ku 50,000 muri icyo gihugu. Abaganga baravuga ko ubu bwiyongere buterwa n'ubwoko bushya bwa virusi ya Corona kuko bwandura cyane. Iki kibazo cyatumye Ubwongereza busubira muri gahunda ya "guma mu rugo" ndetse ibihugu birenga 40 bihagarika ingendo byakoreraga yo.

Igihugu cya Phillipine cyavuze ko gihagaritse abinjira bavuye muri Leta zunze Ubumwe z'Amerika kugeza taliki 15 uku kwezi nyuma y'aho ubwoko bushya bwa virusi ya Corona bugaragaye muri Leta ya Florida. Ibaye Leta ya gatatu igaragaye mo ubwandu bw'ubwoko bushya bwa virusi ya Corona nyuma ya Colorado na California

Ubufaransa nibwo bubarurwa mo abanduye benshi mu burengerazuba bw'Ubulayi. Ikigo cy'ubushakashatsi cya John's Hopkins kivuga ko bagera kuri miliyoni 2.6. Ubufaransa bwagabye abapolisi barenga 100,000 ngo bahagarike ibirori byo kwizihiza umwaka mushya ariko ibyo ntibyabujije abanyabirori mu majyaruguru ashyira uburengerazuba bw'icyo gihugu kuwizihiza aho bari bakoraniye hafi y'umujyi wa Rennes.

Ubutaliyani buravuga ko abandi bantu 462 bishwe na virusi ya Corona ku wa gatanu. Nkuko bitangazwa n'ikigo cy'ubushakashatsi cya John's Hopkins, ku mugabane w'Ubulayi, Ubutaliyani nicyo gihugu cyapfushije abantu benshi bazize iyi ndwara.

Naho mu Bushinwa abagenzi baca ku bibuga by'indege bibiri bikomeye bya Shenyang na Dalian barasabwa kubanza kwerekana impapuro zo kwa muganga zerekana ko nta bwandu bafite mbere yo gusohoka mu gihugu. Ku wa gatanu, Ubushinwa bwatangaje ko abandi bantu 19 banduye ubwoko bushya bwa virusi ya Corona. Muri bo, 10 banduriye hanze y'igihugu.

Facebook Forum

XS
SM
MD
LG