Mu itangazo yashyize ahagaragara uyu munsi i Londres, Save the Children ivuga ko intambara z'urudaca kw'isi, icyorezo cya virusi ya Corona n'imihindukire y'ibihe byongereye cyane ibibazo by'inzara, cyane cyane mu bihugu 11 muri Afurika, mu birwa bya Caraibes, mu Burasirazuba bwo hagati, no muri Aziya. Ibyo ni Burkina Faso, Repubulika ya Demokarasi ya Congo, Mali, Nijeri, Nijeriya, Somaliya, Sudani y'Epfo, Sudani ya Ruguru, Haiti, Yemeni n'Afuganistani.
Save the Children iratangaza ko ihangishijwe cyane by'umwihariko n'inzara ku bana batarageza ku myaka itanu y'amavuko bagera kuri miliyoni 11 bo muri ibi bihugu. Irashimangira ko abana bari muri iki kigero ari bo banyantege nke cyane. Iyo batabonye ibiribwa bihagije kandi bikwiye, ingaruka ziba mbi mu buzima bwabo, mu mikurire yabo, no ku bwonko bwabo, ndetse n'urupfu.
Save the Children irasaba amahanga kugoboka aba bana, ariko cyane cyane no kurangiza impamvu zitera inzara, ni ukuvuga nyine intambara, ibyorezo by'indwara, n'imihindukire y'ibihe.
Umuryango w'Abibumbye, ONU, umaze gusohora amadolari miliyoni 80 yo gufasha ibihugu birindwi kuri ibi 11 byugarijwe n'inzara kurusha ibindi Afuganistani, Burkina Faso, Repubulika ya Demokarasi ya Congo, Nijeriya, Sudani y'Epfo, na Yemeni. Andi madolari miliyoni 20 azaba abitswe ku ruhande mu rwego rwo kwitegura kugoboka Etiyopiya igihe icyo ari cyo cyose.
Facebook Forum