Abana batandatu bari bashimuswe mu majyaruguru ya Etiyopia, barashwe n’abari babatwaye. Babishe nyuma y’uko imiryango yabo ibuze amafaranga y’ingurane yasabwaga.
Amabandi atarabashije kumenyekana, yatwaye abana umunani hafi y’ahitwa Gondar, mu gice cy’intara ya Amhara kw’italiki ya 20 y’uku kwezi kwa 12. Basabaga imiryango yabo gutanga amafaranga ya Etiyopiya 120,000, ni ukuvuga agera ku madorali 3,700. Byatangajwe n’ibiro ntaramakuru Amhara Mass Media.
Aho imiryango inaniriwe gutanga ayo mafaranga y’ingurane, abashimuse abo bana babazikirishije ibiziriko babiri babiri, barabarasa kw’italiki ya 29 y’ukwezi kwa 12 nk’uko ibyo biro ntaramakuru bibitangaza.
Umwe mu bana yabashije kwigobotora iyo ngoyi ashobora gutoroka abamushimuse ntibashobora kumurasa, mu gihe undi yabonetse ari muzima n’ubwo yari yarashwe.
Abo bana bari bafite hagati y’imyaka 10 na 16 y’amavuko. Polise ntiyari yabasha kumenya abari inyuma y’ubwo bwicanyi.
Abashimuta abantu hamwe n’amabandi y’abanyarugomo muri rusange, bakunze kuboneka muri lokalite ya Tegede, aho ibyo byaha byabereye. Cyakora kwica abana nyuma yo kubashimuta ni ibintu bitari bisanzwe.
Facebook Forum