Abaminisitiri 2 b’Afurika y’Epfo Binjijwe Ibitaro Kubera Virusi ya Corona

Perezidansi y’Afurika y’epfo, yavuze ko babiri mu bagize guverinema y’iki gihugu, bashyizwe mu bitaro barwaye COVID-19. Thembelani Nxesi, minisitiri w’umulimo na Gwede Mantashe, ufite amabuye y’agaciro mu nshingano ze, binjijwe ibitaro ejo kuwa mbere. Abo bagabo bombi bari barishyize mu kato nyuma yo gupimwa virusi ya corona bagasanga barayanduye, hashize hafi icyumweru.

Itangazo rya Perezidansi ryagize iti: “Twifurije minisitiri Nxesi na minisitiri Mantashe gukira vuba kandi neza”. Ryungamo rivuga ko kuba bari mu bitaro bizabaha amahirwe yo kubona ubuvuzi buboneye no gukurikiranirwa hafi.

Afurika y’Epfo, igihugu gikize ku nganda ku mugabane w’Afurika, kibarwamo abantu 372,628 bemejweho iyo virusi. Yahitanye ibihumbi bitanu n’ijana na mirongo irindwi na batatu.