Mu Bufaransa, urukiko rwa rubanda rwihariye (Cour d'Assises Spéciale) uyu munsi rwatangiye kuburanisha urubanza rw'abantu baregwa ibitero by'iterabwoba byahitanye abantu 130 i Paris mu mwaka w'2015.
Ku italiki ya 13 y'ukwa 11 mu 2015, abaterabwoba icyenda bagabye ibitero icyarimwe ahantu hatatu hatandukanye mu murwa mukuru w'Ubufaransa.
Umutwe wa Leta ya Kislamu watangaje ko ari wo wakoze ibyo bitero. Usibye abantu 130 babiguyemo, abandi barenga 400 barakomeretse. Ni byo bitero byahitanye abantu benshi mu mateka y'Ubufaransa.
Mu babigabye, umwe rukumbi ni we ukiriho, Salah Abdeslam w'imyaka 31 y'amavuko. Abandi biturikije n'ibisasu bari bambariyeho cyangwa bishwe n'abapolisi nyuma y'ibitero. Salah Abdeslam ni we watangiye kuburanishwa uyu munsi, ari kumwe n'abandi bantu 13 bashinjwa ko bagize uruhare mu buryo butandukanye mu bikorwa byo gutegura ibitero.
Abandi batandatu bazaburanishwa badahari. Ntibaratabwa muri yombi, ariko inzego z'umutekano z'Ubufaransa zikeka ko baba barapfiriye mu ntambara zo muri Syria na Iraki.
Urukiko n'inkengero zarwo hararinzwe bikomeye cyane n'abapolisi barenga igihumbi. Urubanza ruzamara amezi icyenda. Abazahamwa n'ibyaha bashobora kuzakatirwa gufungwa burundu.
Mu batangabuhamya bategerejwe harimo François Hollande, wari umukuru w'igihugu igihe ibitero byabaga, uwari minisitiri we w'ubutegetsi bw'igihugu Bernard Cazeneuve, n'uwari porokireri wa Repubulika, François Molins.
Guverinoma y'Ubufaransa yategetse inzego z'umutekano guhora barikanuye igihe cyose urubanza ruzamara, cyane cyane ku nyubakwa z'amadini, ibigo by'amashuli, n'ahantu hose hahurira abantu benshi.
Facebook Forum