Muri Cote d’Ivoire amashyaka ya poritiki menshi yishyize hamwe kugira ngo arwanye abivumbuye kuri guverinoma.
Inyandiko yavuye mu nama y'ayo mashyaka i Abidjan ku wa 4 yatsindagiraga ko amatora yagejeje perezida Laurent Gbagbo k’ubutegetsi mu kwezi kwa 10 muri 2000 yaciye mu nzira z’amategeko.
Nyamara uwitwa Alassane Ouattara uri m’ubuhungiro, akaba anayobora ishyaka ry’abaharanira repuburika ritavuga rumwe n’ubutegetsi bwa Cote d’Ivoire, we yatangaje ko iyo nyandiko ari impfabusa.
Ouattara yangiwe kwiyamamaza muri ayo matora kubera ngo ubwenegihugu bwe butari busobanutse neza. Ubu ashyigikiye umutwe MPCI wivumbuye bwa mbere k’ubutegetsi bwa Laurent Gbagbo. Uwo mutwe usaba amatora atabogamye kandi adaheza.
Hagati aho, insoresore ibihumbi n’ibihumbi ku wa 4 zari ku ishuri ry’abapolisi i Abidjan zigiye kwiyandikisha mu gisirikari cya guverinoma. Guverinoma yari iherutse gutangaza ko ikeneye abandi basirikari ibihumbi 3 bo kuyifasha kurwanya abayivumbuyeho.