Ku cyumweru imitwe 22 irwanira ubutegetsi bwa Somalia yasinyanye amasezerano y’agahenge mu mishyikirano y’amahoro yaberaga muri Kenya. Ako gahenge kagamije guhosha intambara imaze imyaka 10 yose iyogoza Somalia.
Intumwa yihariye ya Kenya muri Somalia, Elijah Mwangale, avuga ko isinywa ry’ayo masezerano y’agahenge ari intambwe ikomeye.
Iyo mitwe yose yemeye kwubahiriza ako gahenge no gutegura guverinoma ihuriweho n’uturere twose. Abayobozi b’intara ya Puntland yipakuruye ubutegetsi bw’i Mogadishu - na bo basinye ayo masezerano. Gusa intara ya Somaliland mu majyaruguru ya Somalia - na yo yipakuruye guverinoma y’i Mogadishu - ntiyayasinye.
Mu mwaka w’ibihumbi 2 na none imishyikirano y’amahoro hagati y’imitwe irwanira muri Somalia yari yashoboye gushyirishaho guverinoma ya Somalia yose. Gusa iyo guverinoma ntiyigeze ishobora no kwisubiza umurwa mukuru Mogadishu wose.
Amasezerano yo ku cyumweru ashyigikiwe n’ibihugu byinshi by’amahanga, harimo abaturanyi ba Somalia, Leta Zunze Ubumwe z’Amerika, Umuryango w’Ubumwe bw’i Burayi, Umuryango w’Abarabu n’Umuryango w’Abibumbye.
Kurangiza akaduruvayo ka poritiki muri Somalia bifitiye benshi akamaro, cyane cyane kubera impungenge ko ako kaduruvayo gashobora gutuma Somalia iba indiri y’ibyihebe.