Ku wa mbere, tariki ya 2 Nzeri, 2002, urubanza rwa Colonel Theoneste Bagosora rwarasubukuwe m’Urukiko Mpuzamahanga rw’Arusha. Urwo rubanza arufatanije n’abandi basirikari 3 bakuru bashinjanywa kuba ngo barategetse interahamwe kwica abatutsi mu Rwanda muri 1994. Abo baburanira hamwe ni Anatole Nsengiyumva, Aloys Ntabakuze na Gratien Kabirigi.
Bose uko ari bane bahakanye ibyo baregwa ubwo baburanishwaga bwa mbere ku itariki ya 2 z’ukwezi kwa kane muri uyu mwaka. Nyuma urwo rubanza rwarasubitswe kubera ko ababuraniraga binubiye ko hari inyandiko zikomeye zitarizasemuwe mu Gifaransa.
Ibiro ntaramakuru Hirondelle bivuga ko urubanza rwo ku wa mbere ngo rwaranzwe n’impaka ku kibazo cyo kumenya niba umunyamerikakazi Alison Des Forges ukorera umuryango Human Rights Watch ashobora kuba umugabo w’ubushinjacyaha. Umunsi ngo warangiye nta cyemezo kirafatwa. Alison Des Forges amaze kuba umugabo mu manza ebyiri z'i Arusha, urwa Jean Paul Akayesu wari Burugumesitiri wa Taba, n'urubanza rwiritiriwe itangazamakuru, rurimo Jean Bosco Barayagwiza, Ferdinand Nahimana na Ngeze Hassan.
M’urubanza rwo ku wa mbere, Theoneste Bagosora, Anatole Nsengiyumva, Aloys Ntabakuze na Gratien Kabirigi bose ngo bari bitabye urukiko. Nyamara mu kwezi kwa kane bari banze kwitaba, bavuga ko ngo uburenganzira bwabo bwari bwabangamiwe.