Kuronka amazi meza ku Musaga mu gisagara ca Bujumbura nti vyoroshe. Muri komine Musaga m’ubumanuko bw'igisagra ca Bujumbura, kuronka amazi ni ikibazo kigoye cane. Ku mabomba atanu aha amazi abantu barenga ibihumbi amajana atatu, abiri gusa niyo akora, kandi amazi arashobora kumara indwi zibiri atabonetse.
Iyo amazi abonetse, imisunikano iba myinshi. Abantu baba ku Musaga baganiriye na radiyo Ijwi rya Amerika, bavuga ko bashobora kumara amasaha arenga atanu barindiriye amazi. Umusore akora akazi ko mu nzu, Emile Nahimana, yabwiye Ijwi rya Amerika ko uwo musi yavyutse isaha cumi n'imwe yo mu gitondo, ariko ko gushika isaha zine zo mu gitondo yari agitonze, arindiriye ko amazi aza. Umupfasoni Estela Bukuru nawe nyene,yavuga ko amaze amasaha ane arindiriye amazi. Estela Bukuru yiganiye Ijwi rya Amerika ko kenshi na kenshi avoma amazi mabi mu ruzi Muha, akaba ariyo akoresha. Estela Bukuru avuga ko afise ubwoba ko amagara yiwe n'ay'abana biwe batatu ashobora kubangamirwa.
Aho ku Musaga abakozi bo mu nzu batangaza ko akazi kabo katoroshe. Iyo bagiye kurondera amazi, ivyo basize ku mbabura birashika ko bizigira, ababakoresha nabo bakabakarira. Abo bakozi babwiye Ijwi rya Amerika ko basigaye banka kuja gusaba akazi mur'iyo komine ya Musaga, iyo bemeye naho bagasaba amafaranga menshi imiryango idahuta iremera.
Ishirahamwe REGIDESO ariryo ryonyene rijejwe gutanga no kugurisha amazi, rivuga ko mu gihe c'ici amazi akunda gukena. Ariko kandi n'abanywanyi b'iryo shirahamwe bavuga ko rikunda kugira ingorane z'ibikoresha. Mu Burundi, ibice birenga mirongo ine na bitanu vy'abanyagihugu nti baronka amazi meza. Uburundi buri mu bihugu bikenya kw'isi, aho amazi yo mw'ibombo ashobora kunyobwa ata kindi kintu na kimwe ashizwe mwo canke ngo arinde gutekwa.
