Inama y'umutekano mu karere kâibiyaga bigari ikoraniye i Kigali. Abaperezida b'inteko zishinga amategeko zo mu bihugu 11 bigize inama y'umutekano mu karere k'ibiyaga bigari bari mu Rwanda. Bazasuzuma uko amasezerano ya Nairobi yo mu kwezi kwa 12 mu mwaka wa 2006, ku mutekano, amahoro n'iterambere yashyirwa mu bikorwa.
Honorable Vital Kamerhe, Perezida w'inteko ishinga amategeko muri Congo, ni umwe mu bitabiriye iyi nama.Yabwiye Ijwi ry'Amerika ko Congo atariyo ibangamira ishyirwa mu bikorwa ry'ayo masezerano, ko ahubwo icyo ishyize imbere ari uko amahoro asesuye yagaruka mu karere kose k'ibiyaga bigari.
Honorable Kamerhe yanavuze ko kugira ngo ikibazo cy'umutekano mucye muri Congo gicyemuke, ko yaba Congo ndetse n'u Rwanda, ibyo bihugu byombi bigomba kubigiramo uruhare.
Honorable Kamerhe avuga ko inzira y'ibiganiro hagati y'abanye Congo ariyo yafasha mu gucyemura ikibazo cy'umutekano mucye urangwa mu burasirazuba bwa Congo, kandi ko no kongera kugirana umubano nu Rwanda ushingiye kuri z'Ambasade nabyo bicyenewe.
Iyi nama yitabiriwe n'ibihugu 11 byo mu karere k'ibiyaga bigari aribyo u Rwanda, u Burundi, RD Congo, Uganda, Tanzania, Kenya, Sudani, Angola, Zambia, Repubulika Centra Africa, na Congo Brazaville. Yafunguwe ku itariki ya 2 z'ukewezi kwa 12 mu mwaka wa 2008, ikazarangira ku itariki ya 5 z'uko kwezi