Uko wahagera

Raporo y'Intango ku Matora y'Abadepite mu Rwanda


Indorerezi z'Ubumwe bw’Ibihugu by’i Bulayi zashyize ahagaragara Raporo y'intango ku matora y'Abadepite mu Rwanda. Iyo raporo y'intango y'indorerezi yibanze ku matora ataziguye, yabaye ku itariki ya 15 z'ukwezi kwa 9 mu mwaka wa 2008. Zasanze ayo matora muri rusange yarateguwe neza, ariko ko hari ibitagenze neza.

Iyo raporo yibanze ku gutanga kandidatire, ku gikorwa cyo kwiyamamaza, ku ikoreshwa ry'ibitangazamakuru, ku munsi w'itora nyirizina, ndetse no kubarura amajwi.

Ku ikoreshwa ry'ibitangazamakuru, iyi raporo yibanze cyane cyane ku mwanya ungana wari wagenewe abiyamamaza bose mu bitangazamakuru bya Leta. Iyi raporo igaragaza ko ibyo bitigeze byubahirizwa, ko hajemo ubusumbane bukabije. Aho FPR n'andi mashyaka byari bifatanije wasangaga byihariye umwanya munini muri ibyo bitangazamakuru, hakurikijwe umwanya wagenerwaga PSD na PL ndetse n'umukandida wigenga.

Ku munsi w'amatora nyirizina, iyo raporo ivuga ko amatora yabaye mu ituze, kandi ko yari yateguwe neza. Nyamara, ngo mu biro birenga kimwe cya kabiri byagezwemo n'indorerezi z'Ubumwe bw'Ibihugu vy’i Bulayi ngo zasanze bitigeze byubahiriza amategeko n'amabwiriza agenga amatora. Hari aho zasanze ibiro bimwe byatangiye gutoresha mbere y’isaha yari iteganijwe, cyangwa bigafungura bitinze.

Michael Cashman, ukuriye izo ndorerezi, yatangaje ko ntacyo bakemanga ku majwi yatangajwe na komisiyo y'igihugu y'amatora.

Indorerezi z'Ubumwe bw'Ibihugu vy’i Bulayi zivuga ko ku munsi w'amatora ataziguye zari zohereje indorerezi 101 hirya no hino mu Rwanda. Zimenyesha ko raporo isoza kandi irambuye zizayishyira ahagaragara mu gihe cy'ukwezi kumwe.

XS
SM
MD
LG