Mu rwego
rwo kwitegurira amatora y'abadepite k'uburyo butaziguye azaba mu Rwanda ku itariki ya 15 z'ukwezi kwa 9 mu mwaka wa 2008, ishyaka
riri k'ubutegetsi mu Rwanda, FPR-Inkotanyi, ryahisemo abantu 120
bazashyikirizwa biro politiki y'iryo shyaka, ikazahitamo 80 bazashyirwa kuri
lisite y'itora yaryo.
Ayo
matora y'intango yakozwe mu turere 30 tugize u Rwanda, ku itariki ya 10
z'ukwezi kwa 8 mu mwaka wa 2008. Muri buri karere hatowe abantu 4. Ni ukuvuga
bose hamwe 120.
Amabwiriza
ya komisiyo y'igihugu y'amatora, agenga amatora y'abadepite yo mu mwaka wa
2008, avuga ko lisiti y'imitwe ya politiki cyangwa ishyirahamwe ry'imitwe ya
politiki ritarenza amazina y'abakandida 80. Amwe mu mashyaka, nk'ishyaka
ry'abakozi rya PSR, ryamaze gutangaza ko rizakomeza kwifatanya na FPR-Inkotanyi
mu matora ataha y'abadepite.
Umuryango
FPR-Inkotanyi ufite icyizere cyo kuzatsinda ayo matora y'abadepite. Byemejwe na
Perezida wawo akaba na Perezida wa Repubulika y'u Rwanda, Paul Kagame, mu
kiganiro yagiranye n'abanyamakuru ku itariki ya 31 z'ukwezi kwa 7 mu mwaka wa
2008. Aho yatangaje ko bazayatsinda k'uburyo burushijeho.
Igikorwa cyo gushyikiriza lisite y'abakandida komisiyo y'igihugu y'amatora bazahagararira buri mutwe wa politiki, kizatangira ku itariki ya 12 kugeza ku itariki ya 21 z'ukwezi kwa 8 mu mwaka wa 2008.