Kuwa 3 Mata 2007, urukiko rukuru rwa gisirikare i Nyandugu mu mujyi wa Kigali, rwumvise imyanzuro y’ubujurire y’urubanza rwa Gen. Maj. Munyakazi Laurent, ushinjwa ibyaha bya genocide.
Mu rwego rw’ubujurire, ubushinjacyaha bwa gisirikare, bwongeye gusaba ko urukiko rukuru rwa gisirikare rwahanisha Gen. Maj. Munyakazi igihano cyo kwicwa, bitewe n’uruhare yagize mu gutegura no gushyira m bikorwa genocide, rukamuhamya ibyaha yari yagizweho umwere n’urukiko rwa gisirikare harimo icyaha cyo kuyobora genocide.
Gen. Maj. Munyakazi k’uruhande rwe, wiburaniye mu rwego rw’ubujurire ntawe umwunganira yashatse, yongeye gutakambira urukiko ko rwamugira umwere, rukamuhanaguraho ibyaha byose yashinjwe n’urukiko rwa gisirikare kubera ko ntabyo yigeze akora, ko ari umwere.
Twabibutsa ko, mu rukiko rwa gisirikare kuwa 18 Ukwakira 2006, ubushinjacyaha bwa gisirikare bwari bwasabiye Gen. Maj. Munyakazi igihano cyo kwicwa, cyakora mu gusoma urubanza kuya 16 Ugushyingo 2006, urukiko rumukatira gufungwa burundu.
Igihano cyo gupfa cyongeye gusabirwa Gen Maj. Munyakazi, mu gihe mu kwezi kwa Werurwe, inteko ishinga amategeko y’u Rwanda, yatoye k’uburyo budasubirwaho ikurwaho ry’icyo gihano mu Rwanda.
Urukiko rukuru rwa gisirikare ruzasoma ubujurire mu rubanza rwa Gen. Maj. Munyakazi Laurent kuwa 27 Mata 2007.