Muri Cote d’Ivoire abaminisitiri b’imitwe irwanya guverinoma yaho baraye bemeye gusubira muri guverinoma y’ubumwe y’icyo gihugu. Bari bamaze amezi 5 barayishingutsemo kubera ibitero guverinoma yabagabagaho, irenze ku masezerano y’agahenge.
Ejo babiri muri abo baminisitiri bagiye mu nama ya guverinoma i Abidjan. Gusa barindwi bandi ntibayigiyemo. Bamwe mu batarahabonetse bavuze ko babujijwe n’impamvu z’umutekano wabo.
Mu cyumweru gishize ni bwo abarwanya guverinoma ya Cote d’Ivoire bemeye gusubira muri guverinoma y’ubumwe yashyizweho mu mwaka wa 2003. Muri iyo guverinoma bafitemo minisiteri 9.
Inama yo ku wa 5 yabaye mu gihe i Abidjan barimo bashyingura imiramo y’abantu bagera kuri 50 baguye mu myigaragambyo y’abatavuga rumwe mu mwaka ushize.
Abategetsi b’Umuryango w’Abibumbye muri Cote d’Ivoire bavuga ko abashinzwe umutekano muri guverinoma ngo bahitanye abantu basaga 100 muri iyo myigaragambyo yabaye mu kwezi kwa 3 mu mwaka ushize. Abigaragambyaga icyo gihe basabaga ko amasezerano y’amahoro yari yasinywe murri 2003 ashyirwa mu bikorwa.