Minisiteri y’ubuzima muri Uganda, iravuga ko umubare w’abantu byemejwe ko banduye indwara ya Ebola mu gihugu, wazamutse. Bavuye kuri batatu bamaze kuba icyenda.
Minisiteri y’ubuzima yatangaje mu ijoro ryo ku wa mbere ko mu bantu icyenda bemejweho indwara ya Ebola, umwe yapfuye. Barindwi barimo kuvurirwa mu bitaro byo mu murwa mukuru Kampala, naho umwe yari mu bitaro byo mu mujyi wa Mbale, biherereye mu burasirazuba bw’igihugu, hafi y’umupaka n’igihugu cya Kenya.
Iyo minisiteri yavuze ko abarwayi umunani bose bameze neza, kandi abantu 265, bagize aho bahurira nabo, bashyizwe mu kato. Muri uku kwezi, ishami rya ONU ryita ku buzima, OMS, ryavuze ko Uganda yatangije gahunda yo gutanga urukingo rw’indwara ya Ebola yaturutse muri Sudani, ruri mw’igeragezwa.
Inkingo ziriho ubu ni iz’ubwoko bwa Ebola yitwa Zayire, mu bihe bya vuba yari yabaye icyorezo muri cya Repubulika ya Demokarasi ya Kongo.
Icyorezo giheruka ni icya virusi yaturutse muri Sudani, kugeza ubu urukingo rwayo ntiruremezwa. (Reuters)
Forum