Umushikiranganji ajejwe ibikorwa vya reta muri Kenya, Justin Muturi, yatangaje ko umuhungu wiwe yigeze kunyuruzwa, yanyurujwe n'abajejwe iperereza.
Umuhungu wa Justin Muturi yari yanyururijwe mu myiyerekano yo kwiyamiriza reta yabaye mu mwaka uheze. Yavuze ko yarekuwe inyuma y’uko Prezida wa Kenya, William Ruto, wenyene ubwiwe abigizemwo uruhara.
Ivyatangajwe na Justin Muturi, mw’itangazo ryanditse yashikirije igipolisi, kuri uyu wa kabiri, vyafashwe nk'ivyemezo vy'uko Prezida wa Kenya, William Ruto yari azi n’imiburiburi abari inyuma ya bimwe mu bikorwa vyo kunyuruza abaharanira agateka ka muntu batari bake vyatanguye mu kwezi kwa gatandatu kw’umwaka urangiye w’i 2024.
Mw’itangazo Justin Muturi, yashikirije urwego rujejwe gutohoza ivyaha muri Kenya, yavuze ko yagiye ubwiwe n’imodoka kuraba Prezida Ruto ku muhana iwe kw’italiki 23 y’ukwezi kwa gatandatu mu mwaka urangiye w’i 2024.
Hari inyuma y’uko umuhungu wiwe, Leslie, anyurujwe n’abo yise inkozi z’ikibi zitwaje ibirwanisho zari zihishjije mu maso. Muturi yatangaje ko Ruto yaciye ahamagara umuyobozi mukuru w’ibiro bijejwe iperereza muri Kenya, Noordin Haji, kugira ategeke irekurwa rya Leslie.
Ntaco ibiro vya Prezida William Ruto n’ivy’umunyamabanga mukuru w’ibiro bijejwe iperereza, vyishuye kuri ico kibazo igihe vyari bibajijwe kugira ico bikivuzeko.
Mu vyo yatangaje ku mugaragaro kuva mu kwezi kwa gatandatu mu mwaka urangiye w’i 2024, Prezida Ruto yarerekanye impungenge ku vyagirizo vy’amashirahamwe aharanira agateka ka muntu vy’uko abajejwe iperereza banyuruza abantu, aho abantu batamenyekana bapfunga abantu bakabagumana mu kiringo c’imisi itari ike mu bibanza bitazwi ata vyaha bagirijwe. (REUTERS)
Forum