Amerika yategetse Isirayeri gutanga agahengwe muri Gaza no gutezurira abanyagihugu bo muri iyo ntara yo muri Palestina babayeho mu buzima bubi, bitagenze uko, Amerika ivuga ko Isirayeri izotakaza imfashanyo zose za gisirikare iha ico gihugu kibandanya kurwana n’umurwi wa Hamas.
Ikimenyeshamakuru co muri Aamerika, Axios, gitangaza ano makuru kivuga ko ku wa Mungu w’indwi iheze ari ho umushikiranganji w’imigenderanire y’Amerika n’ayandi makungu, Antony Blinken, na mugenzi we aramustwa ubushikiranganji bwo kwivuna abansi, Lloyd Austin, bandikira abategetsi ba Isirayeri babagabisha.
Mw’ikete abo bategetsi barungikiye Isirayeri, bavuze ko muri rusangi ibintu bibandanya kunyuka muri Palestina. Ikete rigira riti: “Tubandikiye ngo tubabwire ko guverenema ya Amerika ihangayikishijwe n’ibibera muri Gaza. Dukeneye ko vyihuta muri uku kwezi, ibiberayo bihagarara. Bitagenze uko, bizotuma hari politike ya Amerika ku bijanye n’ino ntambara ihinduka”
Muri iryo kete, Amerika yategetse Isirayeri ko bitarenze iminsi 30, ibwirizwa kureka amakamyo 350 arimwo imfashanyo z’abanyagihugu akinjira muri Gaza ku munsi ku munsi, gushiraho ibihe vy’agahengwe k’intambara kugira imfashanyo zishike iyo zija, no kureka kwimura abasivile igihe cose ata bikorwa vya gisirikare itegekanya.
Ubushikiranganji bujejwe imigenderanire y’Amerika n’ayandi makungu, ibiro bikuru vya gisirikare muri Amerika, Pentagon, n’ubuserukizi bwa Isirayeri muri Amerika vyanse kugira ico bivuga kuri iri kete n’ibiririmwo. Ibiro vya Prezida wa Amerika, White House, navyo vyanse gutomora niba Prezida Joe Biden ari mu barishizeko umukono.
Abategetsi ba Amerika batatangajwe amazina bemereye ariko itororokanirizo ry’amakuru y’abongereza, Reuters, ukuri kw’iryo kete. Bavuze ko mu barirungikiwe, harimwo umushikiranganji wo kwivuna abansi muri Isirayeri, Yoav Gallant. Urundi ruhande rwemeje ko iryo kete ryarungistwe koko, ni ikimenyeshamakuru Israeli News 12 co muri Isirayeri. Ico kimenyeshamakuru ni co caritangaje ubwa mbere.
Itororokanirizo ry’amakuru y’abongereza, Reuters, dukesha ibiri muri ino nkuru vyose rivuga ko kuva intambara ya Hamas na Isirayeri itangura haraheze umwaka, ari ubwa mbere Amerika igabishije Isirayeri ishimitse kandi itarya umunwa.
Reuters ivuga ko mu misi iri imbere, Amerika ishobora guhindura umukenyuro mu bijanye no gushikira Isirayeri mu ntambara irimwo na Hamas. Amerika iha Isirayeri imfashanyo za gisirikare ziharurwa mu mamiriyaridi y’amadorari. (REUTERS)
Forum