Uko wahagera

Abanyamerika 3 Begukanye Agashimwe ka Nobel mu Butunzi


Agashimwe kitiriwe Nobel mu gisata c’ubutunzi kegukanye abagabo batatu: Daron Acemoglu, Simon Johnson na James A. Robinson. Bashimiwe ku ruhara bagize mu kwerekana neza ingaruka z’ubukoloni ku butunzi bw’ibihugu. Bagaragaje neza igituma ibihugu bimwe bitera imbere, ibindi bigasubira inyuma nk’ibirenge.

Daron Acemoglu ni Umunyamerika akomoka muri Turukiya, naho Simon Johnson na James A. Robinson nabo ni Abanyamerika bakomoka mu Bwongereza.

Acemoglu na Johnson ni abarimu muri Kaminuza ya “Massachussetts Institute of Technollogy” muri reta ya Massachusetts aha muri Amerika, Robinson nawe ni umwarimu w’umushakashatsi muri kaminuza ya Chicago yo muri Reta ya Illinois. Uko ari batatu, bazosangira agashimwe k’umuriyoni umwe n’ibihumbi ijana vy’amadorari.

Umurwi ujejwe gutanga ubushimwe bwitiriwe Nobel, wavuze ko aba bagabo uko ari batatu, bashoboye kwerekana uruhara inzego zigira mu guteza imbere ibihugu, n’ingaruka ubucakara bwagize mu busumbasumbane bw’ubutunzi hagati y’ibihugu.

Jakob Svensson atwara umurwi ujejwe ivy’ubushimwe bwitiriwe Nobel mu gisata c’ubutunzi yavuze ko ivyigwa bakoze, vyererekanye neza ko ibihugu birya imitsi y’abanyagihugu ntibigendere ku mategeko bidatera imbere. Ivyo bihugu bidatera imbere, akenshi bizingamistwe n’intwaro mbi hamwe n’ibiturire nkuko abatahukanye agashimwe babivuga. Bashimiwe kandi kuba “barashoboye kwerekana ko kugabanya ubusumbasumbane bw’ubutunzi hagati y’ibihugu kikiri ikibazo gikomeye.”

Daron Acemoglu, umwe mu baronse agashimwe kitiriwe Nobel mu vy’ubutunzi yavuze ko yatunguwe cane n’inkuru yise nziza agira ati: “Ntawigera yitega gushikirwa n’ibintu nk’ibi.”

Abatsindiye ubushimwe bwitiriwe Nobel bose bazoburonka igenekerezo rya 10 mu kwa cumi na kabiri, umunsi wo kwibuka itariki Alfred Nobel agashimwe kitirirwa, yitabirako Imana

Forum

XS
SM
MD
LG