Umuyobozi mu ishami ry’umuryango w’Abibumbye ryita ku bana (UNICEF) ushinzwe ubuzima mu karere ka Afurika y’iburasirazuba n’Amajyepfo, yatangaje ko bishoboka ko icyorezo cy’ubushita bw’inkende cyarangira mu Burundi mu byumweru bike.
Gusa, Paul Ngwakum aravuga ko bizashingira ku mikoro ahagije no kurwanya ihezwa rituruka kuri iyi ndwara.
Ishami ry'Umuryango w'Abibumbye ryita ku buzima, OMS ryatangaje ko iyi ndwara iherutse kwaduka, izwiho gutera ibiheri birimo amashyira, yabaye ikibazo gihangayikishije Isi mu kwezi kwa munani, nyuma y’uko habonetse ubwoko bushya bwayo.
U Burundi bwatangaje ko abantu bagera kuri 600 barwaye iyi ndwara. Ni igihugu cya kabiri nyuma ya Repubulika ya demokarasi ya Kongo, kibasiwe cyane n’iyo ndwara.
Paul Ngwakum, yavuze ko bishoboka ko iki cyorezo cy’ubushita bw’inkende cyarangira mu byumweru bike.
Yabitangarije abanyamakuru mu kiganiro hifashishijwe uburyo bwa videwo ari i Bujumbura, ati: "Dushobora kugabanya ikwirakwira, guhagarika virusi, kandi birashoboka ko twahagarika iki cyorezo nta muntu gitwariye ubuzima." Yakomeje agira ati: "Ntekereza ko turamutse dufite ibikenewe byose ... dushobora kuyihagarika vuba na bwangu."
Ngwakum yavuze ko kimwe mu byafasha, ari ubushobozi bwo kurwanya ihezwa hakorwa ubukangurambaga kuri iyi ndwara.
Uyu muyobozi yongeyeho ati: "Biteye ubwoba ... Igihe abantu bagira ubwoba kandi bagatinya kugaragara, bizafata igihe kirekire”.
UNICEF irasaba miliyoni 60 z’amadolari y’abanyamerika ku Burundi n’bindi bihugu bitanu birimo iyi ndwara.
Ngwakum yavuze ko abagera kuri bibiri bya gatatu by'abanduye kugeza ubu mu Burundi ari abana. Yagaragaje ko UNICEF irimo gukora ibishoboka ngo isubukure gahunda yifashishijwe mu gihe cya COVID-19 mu bice byitaruye, bityo abana bashobore gukomeza kwigira mu bitaro no mu ngo mu gihe bazaba bari mu kato.
Forum