Minisitiri w’ububanyi n’amahanga wa Leta zunze ubumwe z’Amerika, Antony Blinken, ejo na none yari i Kayiro mu rwego rwo gushakisha agahenge mu ntambara yo muri Gaza.
Yabanje kuganira na Perezida wa Misiri Abdel Fattah el-Sissi. Nyuma yahoo yabonanye na mugenzi we wa Misiri, Badr Abdelatty.
Noneho mu kiganiro bagiranye n’abanyamakuru bombi bari kumwe, Blinken yatangaje ko imishyikirano iri mu nzira nziza.
Yagize ati: “Umushinga w’amasezerano ugizwe n’ibika 18. Impande zombi zarangije kwemereranwa kuri 15 muri byo.” Yasabye Isiraheli na Hamas kwikubita agashyi kugirango ingingo zisigaye nazo bazumvikaneho.
Naho Abdelatty yasobanuye ko Hamas yemereye Misiri ko ifite ubushake bwo kubahiriza amasezerano yo guhagarika imirwano naramuka abonetse. Umushinga wa mbere wayo watunganyijwe mu kwezi kwa Gatanu gushize. Wavuguruwe bwa mbere mu kwa Kalindwi kwakurikiyeho. Ubu ni wo uri hafi kurangira.
Leta zunze ubumwe z’Amerika ni umuhuza hagati ya Isiraheli na Hamas, ifatanyije na Misiri na Katari. (VOA)
Forum