Nijeriya yakiriye doze 10,000 z’urukingo rw’ubushita bw’inkende yahawe n’ikigo cy’Amerika gishinzwe iterambere mpuzamahanga, USAID. Iki ni icyiciro cya mbere cy’inkingo zageze mu gihugu, kuva Nijeriya yemeje ko abantu 40 banduye iyi ndwara kandi kugeza ubu, ntawe yishe.
Muyi Aina, umuyobozi mukuru w'ikigo cy'igihugu gishinzwe iterambere ry'ubuvuzi bw'ibanze (NPHCDA), yavuze ko iyi nkunga ari intambwe ikomeye kuri Nijeriya.
Mw’itangazo, Aina yagize ati: "Turabizi ko izi nkingo zidahagije ugereranyije na doze zikenewe. Ndahamya ko twabonye doze 10,000 muri doze zigera ku 200,000 ubu zabonetse kw’isi hose".
Nijeriya yafashe icyemezo cyo gushyira umwihariko kuri Leta eshanu mu gutanga izo nkingo. Izo Leta zirimo iya Bayelsa, Edo, Cross-River na Lagos, nk'uko USAID yabivuze mw’itangazo ryayo.
Ikigo cy'igihugu gishinzwe iterambere ry'ubuvuzi bw'ibanze muri Nijeriya, ntikiravuga igihe inkingo zizagezwa muri izo Leta, cyangwa abazabanza kwitabwaho mu buvuzi.
Mu muhango wo kugeza izo nkingo kuri guverinema ya Nijeriya, Ambasaderi wa Leta zunze ubumwe za Amerika aho muri Nijeriya, Richard Mills, yagize ati: "Turashishikariza guverinoma ya Nijeriya, gukomeza kwegeranya ubushobozi
imbere mu gihugu, kugira ngo haboneke izindi nkingo zo kurwanya indwara y’ubushita bw’inkende". (Reuters)
Forum