Ministeri y’ububanyi n’amahanga y’Uburusiya yatangaje ko Ukraine yakoresheje ibisasu byo mu bwoko bwa rokete za HIMARS byakorewe muri Amerika, gusenya ikiraro cyo ku ruzi rwa Seym mu karere ka Kursk ko mu Burusiya.
Yavuze ko icyo gisasu cyahitanye abakorerabushake bageragezaga guhungisha abasivili.
Umuvugizi wa ministeri y’ububanyi n’amahanga y’Uburusiya Maria Zakharova, yavuze ko bubaye ubwa mbere Ukraine ikoresha ibisasu byakorewe muri Amerika kurasa mu karere ka Kursk.
Umugaba mukuru w’ingabo za Ukraine Oleksandr Syrskyi yavuze ko zigiye imbere ibirometero biri hagati ya kimwe na bitatu mu turere dutandukanye tw’intara ya Kursk mu minsi 11 zimaze zihagabye ibitero.
Ukraine ivuga ko kuva taliki 6 z’uku kwezi imaze gufata insisiro 82 mu karere gafite kilometero kare 1150.
Ministeri y’ingabo y’Uburusiya kuwa gatandatu yatangaje ko ingabo zayo zasubije inyuma igitero cyari cyagabwe n’ingabo za Ukraine ariko ntiyigeze ivuga ko hari agace zari zashobora kugobotora mu maboko ya Ukraine ngo zikigarurire.
Forum