Igisirikare cya Isiraheli cyatangaje ibyavuye muri anketi ku myitwarire yacyo mu gitero cya Hamas cyo kw’itariki ya 7 y’ukwa cumi gushize. Cyemera ko cyateshutse ku nshingano zacyo.
Icyegeranyo kiribanda cyane ku mudugudu wa Be’eri. Utuwe n’abantu 1,000. Ni wo Hamas yashegeshe cyane. Abarwanyi bayo bahateye ni 340. Bishe 101, bashimuta bunyago abandi 32.
Umuvugizi w’igisirikare, Amiral Daniel Hagari, yatangaje kuri televiziyo. Ati: “Biravunanye kandi biragoye kubivuga. Ariko igisirikare cyananiwe rwose kurengera abasivili, kandi ari cyo gishinzwe.”
Raporo isobanura ko abasirikare batinze cyane kuhagera. Bamaze no kuza, baheze inyuma y’umudugudu amasaha menshi ntacyo bakora. Ngo “ntibari bazi neza ko ubwicanyi bw’abaturage mo imbere bwari bukaze.” N’igihe batangiriye gutabara, uburyo bwo kurwana kwabo “byari akajagali.”
Ahubwo raporo irashima cyane ubutwari bw’abaturage ba Be’eri, n’ukuntu birwanyeho umwanya munini bonyine, umubare w’aba Hamas ubarusha ingufu kure.
Iki cyegeranyo kimaze gushoka, minisitiri w’ingabo za Isiraheli, Yoav Gallant (nawe w’umujenerali wavuye ku rugerero), yavuze ku mugaragaro, ati: “Hakwiye kubaho anketi kuri twese, jyewe, minisitiri w’intebe Benjamin Netanyahu, n’abandi bose bafata ibyemezo n’ababishyira mu bikorwa, ni ukuvuga abo muri guverinoma, mu gisirikare, no mu nzego z’umutekano.” (AP, Reuters
Forum