Mu nkuru zihariye zisobanura ibirebana n’amatora yo muri uyu mwaka muri Leta zunze ubumwe z’Amerika, urwango n’urugomo bigenda byiyongera bizagira izihe ngaruka ku matora y’umukuru w’igihugu yo mu kwa 11 gutaha?
Southern Poverty Law Center, SPLC mu magambo ahinnye, ni ikigo cy’ubushakashatsi n’ubuvugizi mu birebana n’uburenganzira mboneragihugu. Ifite icyicaro gikuru mu mujyi wa Montgomery, umurwa mukuru wa leta ya Alabama, mu majyepfo y’igihugu.
Mu cyegerenyo yashyize ahagaragara mu ntangiriro z’uku kwezi kwa gatandatu, ivuga ko mu mwaka ushize w’2023 hariho imitwe itemera guverinoma 835.
Yavuye kuri 702 mu 2022 yiyongereho indi 133. Naho imitwe igenda ibiba urwango, yari 523 mu mwaka w’2022, yiyongeraho indi mishya 72, igera kuri 595 mu 2023. Yose uko ari 1.430 igizwe hanini n’Abazungu bumva ko bagomba kuba hejuru y’abandi.
Nk’uko abashakashatsi b’ikigo SPLC babisobanura, imvugo, imyitwarire, ibikorwa, ubuhezanguni, n’ingengabitekerezo by’iyi mitwe yose byibasira cyane cyane kw’isonga abitwa LGBTQ+. Aba barimo abakundana bahuje igitsina n’abihindura igitsina bavukanye.
Iyi mitwe ntisiga inyuma kandi abimukira, abadasangiye ibara ry’uruhu n’abayoboke bayo, na ba nyakamwe mu myemerere.
Abahezanguni badashaka Demokarasi
Mu kiganiro yagiranye n’Ijwi ry’Amerika, R.G. Cravens, umushakashatsi mukuru wa SPLC, asobanura ko iyi mitwe igenda irushaho kujya mu bya politiki, ifite umugambi ishaka kugeraho.
“Abahezanguni, abo badashaka demokarasi ihuza bose, bamaze umwaka ushize bacengeza amatwara yo kwigomeka ku gihugu, bakuririza urwango ko ari yo nzira nyayo, bigisha ko guverinoma n’andi moko bahora babagambanira. Bagambiriye, kandi barimo baritegura, kwangiza amatora twimirije imbere. Kurwanya ubudasa ni ukurwanya uburenganzira bwa bose bwo gutora. Ni ukurwanya demokarasi ubwayo.”
Perezida Joe Biden, kandida w’ishyaka ry’Abademokarate, yemeza ko uwo bahanganye, Donald Trump, abifitemo uruhare, kandi ko ari we ushobora kubambira urwango mu matora yo mu kwa 11.
“Sinzareka Donald Trump ahindura Amerika igihugu kitemera ubupfura n’ikinyabupfura, kitubaha abantu. Nzavumwe nindeka Donald Trump ahindura Amerika igihugu cyuzuye umujinya, umubabaro n’urwango.”
Trump, kandida w’ishyaka ry’Abarepubulikani, ntahisha ibitekerezo bye ko ashyigikiye imwe n’imwe mu mitwe iri ku rutonde rwa “Southern Poverty Law Center.” Urugero ni nk’uwitwa “Moms for Liberty.” SPLC ivuga ko uyu mutwe uri mu rwego rw’iy’abahezanguni itemera guverinoma, by’umwihariko itemera uburezi kuri bose mu mashuli.
“Abahezanguni b’ibumoso (Abaharanira impinduka zijyane n'ibihe tugezemo) koko bagashyira “Moms for Liberty” mu byo bita imitwe y’urwango. Ngo muri umutwe w’urwango ra! Muranyumvira namwe! Ngo “Moms for Liberty” ni umutwe w’urwango koko?”
Ijwi ry’Amerika yasabye ikiganiro na “Moms for Liberty” ariko iri shyirahamwe ryanze kuyivugisha. Gusa rero, abakurikirana uko urwango rwa politiki rugenda rwiyongera barasaba abakandida kwirinda gukoresha imvugo ya rutwitsi kugirango itava aho ibyara urugomo n’ubwicanyi muri iki gihe gisatira amatora yo mu kwa 11.
Forum