Agatsiko k’amabandi muri Nijeriya kishe abantu 26 barimo abapolisi bane, banashimuta abandi benshi muri leta ya Katsina iri mu majyaruguru ashyira uburengerazuba bw’igihugu.
Inzego z’umutekano n’iz’ibanze zo mu gace ka Gidan Boka mu karere ka Kankara zemeje aya makuru zasobanuye ko ari amabandi asanganywe ibirindiro mu mashyamba yo muri leta za Zamfara, Katsina, Kaduna na Nijeri. Amenyereweho gukora ubwicanyi, gusahura, gutwika amazu no gushimuta abaturage nyuma agasaba amafranga kugirango arekure abatwawe bunyago.
Umuyobozi w’akarere ka Kankara, Ana Isa, yabwiye ibiro ntaramakuru by’Abafransa, AFP, ko iki gitero cyagabwe mu ijoro ryo ku cyumweru, gihitana abantu 26. Uyu muyobozi avuga ko benshi mu bashimuswe ari abagore n’abana, kandi ko inzego zibishinzwe zatangiye iperereza ryo kumenya umubare nyawo w’abashimuswe.
Mu itangazo ryayo mu ijoro ryo kuwa mbere, polisi muri leta ya Katsina nayo yemeje icyo gitero. Ariko iryo tangazo ryo rivuga ko hapfuye abasivili 15, hakomereka abandi babiri.
Yanemeje umubare w’abapolisi bane bapfuye bazize umutego wayo mabandi.
Mu kwezi gushize, amabandi na none yagabye igitero mu karere ka Sabuwa muri iyi leta ya Katsina, gihitana abantu 25.
Forum