Ibimenyeshamakuru vyo muri Koreya y’epfo bivuga ko Koreya ya Ruguru yakororeye ibipurizo 260 mu gihugu cose ca Koreya y’Epfo.
Igisirikare ca Koreya y’Epfo catanze ano makuru, kivuga ko ivyo bipurizo vy’ibara ribonerana vyarimwo ubutumwa bucafuza Koreya y’Epfo, amazirantoke, ibikoresho vyo kwihanaguza mu kazu ka surwumwe, ivyondo, imyanda mikuru y’ibikoko n’ibindi.
Ibibanza vyakorokeyemwo birimwo amabarabara acamwo imiduga myinshi n’abantu benshi, imbere y’inyubakwa zibamwo abantu, ibibanza bigenderamwo n’abantu benshi, mu micungararo yose ya Koreya y’Epfo, irimwo n’umurwa mukuru, Seoul.
Abategetsi ba Koreya y’Epfo baciye bihutira kurungika ubutumwa mu materefone y’abanyagihugu, bubabuza kuva mu mihana yabo.
Igisirikare ca Koreya y’Epfo cavuze ko ivyo Koreya ya Ruguru yakoze ari ububisha bugayitse, ihonyangwa ku rwego rwo hejuru ry’amategeko mpuzamakungu. Catangaje ko vyabangamiye cane umutekano w’igihugu.
Mw’itangazo Yo Jong, mushiki wa Kim Jong Un atwara Koreya ya Ruguru, yasohoye, yashimagije ico igikorwa, avuga ko ari “ic’ubwenge, impano nziza itabesha, kandi yerekana ubwigenge bwo gushikiriza ivyiyumviro ku banyagihugu ba Koreya ya Ruguru.”
Impande zitandukanye zo muri Koreya y’Epfo, zavuze ko iryo tangazo rya Yo Jong ari iry’agashinyaguro.
Mu ntango z’ino ndwi, Koreya ya Ruguru yari yagabishije ko izokwihora inyuma y’aho umwe mu baharanira agateka ka zina muntu azwi cane muri Koreya y’Epfo arungitse ibipurizo bigera kuri 20 birimwo ibipapuro bivuga nabi ubutegetsi bwa Koreya ya Ruguru, n’ibikoresho birimwo indirimbo za Koreya y’Epfo zibujijwe kuvugirizwa mu ya Ruguru.
Forum