Uko wahagera

Ibitero by’Ingabo za Isiraheri i Rafah Ntibivugwaho Rumwe


Abanyepalestina bari barahungiye i Rafah
Abanyepalestina bari barahungiye i Rafah

Ingabo za Isiraheri kuri uyu wa kabiri zavuze ko amasasu yonyine "adashobora" kuba yarateje inkongi y’umuriro, abayobozi bashinzwe ubuzima muri Gaza, bavuga ko yahitanye abantu 45 mu gace ka Rafah kari mu majyepfo ku butaka bw’abanyepalestina. Iyo nkongi y’umuriro yamaganywe n’amahanga.

Igisirikare cya Isiraheri cyavuze ko cyibasiye kandi cyishe abarwanyi babiri bakuru ba Hamas mu majyaruguru y’iburengerazuba bwa Rafah muri icyo gitero, cyateje inkongi y'umuriro yibasiye inkambi yari yuzuye bavuye mu byabo.

Kuwa mbere, Minisitiri w’intebe wa Isiraheri, Benjamin Netanyahu, yabyise "impanuka ibabaje".

Visi perezida w’Amerika, Kamala Harris, we kuri uyu wa kabiri yavuze ko amagambo "impanuka ibabaje", adashobora gusobanura igitero cy’indege za Isiraheri, cyateje iyo nkongi y’umuriro mu nkambi i Rafah.

Aha yasubizaga ikindi kibazo cy’umunyamakuru wakurikiranye ibijyanye n’ibisasu bya Isiraheri, aho abayobozi mu by’ubuzima mu ntara ya Gaza, bavuze ibyo bisasu mu nkambi yahungishirijwemo abantu mu karere k’uburengerazuba bwa Rafah, byahitanye abantu byibura 21, kuri uyu wa kabiri. Visi Perezida Harris yavuze ko ibi ari nko guhinyuza ibyo Perezida Joe Biden yijeje byo guhagarika intwaro ku gihugu cya Isiraheli, niba incuti y’Amerika, yagabye igitero gikomeye kuri Rafah, gishyira impunzi mu kaga.

Avugira i Washington Visi Perezida Harris, ntabwo yasubije ku kibazo cyabajijwe ku bijyanye n’uko ibitero byabereye i Rafah byarenze "umurongo utukura."

Perezidansi y’Amerika nayo ntiyigeze isubiza ibibazo yandikiwe kuri imeyeri ku gitero cyo kuri uyu wa kabiri. Ku wa mbere, umuvugizi wa Perezidansi yavuze ko urupfu rw’Abanyapalestina "rubabaje", ko Isiraheli igomba "gufata ingamba zose zishoboka kugira ngo irinde abasivili" kandi ko igerageza gusuzuma ibyabaye ku cyumweru.

Umuguzizi w’ingabo za Isiraheri yabwiye abanyamakuru ko ingabo zakusanyije "amakuru yuzuye" mbere y’igitero, harimo no kugenzura ikirere, mu rwego rwo "kugabanya ingaruka ku basivili".

Yagize ati: “Igitero cyibasiye ikigo "hanze y’akarere twagennye nk'akarere k’ubutabazi". Uyu muyobozi yakomeje agira ati: "Turabizi ko mu kigo twagabyeho igitero, harimo abanyamuryango ba Hamas gusa".

Hagari yavuze kandi ko icyateye inkongi y'umuriro nyuma y’igitero, cyari kitari cyamenyekana. Yijeje ko ingabo zizakora iperereza "ryihuse, ryuzuye kandi mu mucyo". (AFP-Reuters)

Forum

XS
SM
MD
LG