Uko wahagera

Ibihugu Bikize Birisubiza Amafaranga Biha Ibikennye mu vy'Ihindagurika ry’Ibihe


Amafaranga ibihugu bikize biha ibikennye mu rwego rwo kubifasha kurwanya ihindagurika ry’ibihe birayisubiranira.

Muri Afrika, imishinga y’abikorera ku giti cyabo ifite uruhare mu kurwanya ihindagurika ry’ibihe imaze gushora amadolari arenga miliyari 3.4 kuva mu 2019. Aracyari kure cyane y’akenewe, agera ku madolari miliyari 277, kugirango Afrika yuzuze inshingano yiyemeje kugera mu 2030.

Aya mafaranga ava mu bihugu bikize. Byemera ko ari byo bifite uruhare runini cyane mu byangiza umwuka, ikirere n’ibidukikije. Naho ibikennye byo kw’isi yose muri rusange, byo bibifitemo uruhare ruto cyane, nyamara bikagira ingaruka zikomeye z’ihindagurika ry’ibihe. Zirimo amapfa agenda yiyongera, n’imyuzure ihora ica agati n’amabuye.

Mu 2009, ibihugu bikize byiyemeje guha ibikennye byo kw’isi yose amadolari miliyari ijana buri mwaka kugera mu 2020 kugirango biyashore mu bikorwa byo kurwanya ihindagurika ry’ibihe. Byarongeye bibishimangira mu masezerano mpuzamahanga yavuye mu nama y’i Paris mu Bufaransa mu 2015.

Reuters, ikigo ntaramakuru cyo mu Byongereza, yafatanyije n’umuryango udaharanira inyungu w’abanyamakuru witwa “Big Local News” wo muri kaminuza y’ubushakashatsi yigenga Stanford, Stanford University, yo muri leta ya California, mu burengerazuba bwa Leta zunze ubumwe z’Amerika, barabikurikirana ku buryo bwimbitse.

Basanze kuva mu 2015 kugera mu 2020, ibihugu bikize byaratanze amadolari miliyari 353. Muri byo, bine biza kw’isonga ni Ubuyapani, Ubufaransa, Ubudage, na Leta zunze ubumwe z’Amerika.

Igice kinini, 54%, yagiye ari amadeni ibihugu bikennye bigomba kwishyura n’inyungu zo ku masoko asanzwe y’imali, aho kuba inkunga y’ubuntu, inguzanyo zishyurwa n’inyungu ntoya zidakanganye, cyangwa se zishyurwa nta nyungu zigiyeho.

Uretse ibyo, amasezerano y’izi nguzanyo ategeka ibihugu bizifashe kugura ibikoresho mu bihugu bizitanze, no gukoresha mu mishanga inguzanyo zigenewe ibigo n’abantu bakomoka mu bihugu bizitanze.

Ibihugu bikize bibikora bivuga ko ari ngombwa kubera ko “ibihugu bikennye biba bidafite ubumenyi buhagije bwo gutunganya imishinga no kuyishyira mu bikorwa.” Naho ababisesengura bakavuga ko atari byiza kuko bidafasha ibihugu bikennye guteza imbere ikoranabuhanga ryo kurwanya ihindagurika ry’ibihe.

Ibi byose ni byo byerekana ko ibihugu bikize byisubiza amafaranga yabyo, ahubwo ibihugu bikennye bikagenda birushaho gukena, kandi byitwa ngo birafashwa. Urugero: amadolari miliyari 10.8 y’inguzanyo zo kurwanya ihindagurika ry’ibihe Ubuyapani bwatanze yasubiyeyo. Ku buhe buryo?

Ubuyapani bagiranye na Filipine amasezerano yo kuyiha inguzanyo zo gukora gari ya moshi zikoresha amashanyarazi n’imihanda yazo. Ubuyapani bwategekaga Filipine kugura ibikoresho mu Buyapani no kuzana kuzikora ibigo byaho nka Sumitomo Corp na Japan Transport Engineering Co.

Andres Mogro, wahoze ari umuyobozi w’ikigo cyo kurwanya ihindagurika ry’ibihe mu gihugu cya Equateur muri Amerika y’Epfo n’intumwa mu mishyikirano yavuyemo amasezerano y’i Paris, yabwiye Reuters na “Big Local News,” ati:

ACT: “Ibihugu bikennye byugarijwe n’ikibazo cy’andi madeni y’ubundi bwoko, ngo ni imali yo kurwanya ihindagurika ry’ibihe. Ntibyakagombye kwirengera ibibazo biterwa n’ibihugu bikize. Ni byo byangiza ikirere.”

Liane Schalatek, umuyobozi w’ishami ry’i Washington D.C. ry’ikigo giharanira kurengera ibidukikije cyo mu Budage cyitwa Heinrich-Boll Foundation, ati: “Ni akumiro rwose! Amafaranga yo kurwanya ihindagurika ry’ibihe akwiye kujya mu byo ibihugu bikennye bikeneye kw’isonga, ntakwiye kuba “ ubucuruzi.”

Naho Rachel Kyte wahoze ari intumwa yihariye ya Banki y’isi yose mu by’ihindagurika by’ibihe, ati: “Uburyo bikorwa bicukura urwobo kurushaho. Twari dukwiye kuvuga, tuti: Turekere aho gucukura urwobo kurushaho, ahubwo tugiye kubakura ikuzimu tubajyane ibuntu.”

Forum

XS
SM
MD
LG