Abayobozi ba Libiya bafite icyicaro mu Burasirazuba bw’igihugu, barimo gukora iperereza kw’ibura ry’umwe mu bagize inteko ishinga amategeko. Byavuzwe na minisitiri w’ubutegetsi bw’igihugu mu karere. Yavuze kandi ko adakeka ko uwo muyobozi yaba yarishwe.
Depite i Bengazi, Ibrahim Aldrasi, yaburiwe irengero nyuma yo guterwa n’abajura mu rugo iwe. Ibi biravugwa n’urwego rushinzwe itangazamakuru muri iyo minisiteri. Biri mw’itangazo ryashyizwe ahagaragara mu mugoroba w’ejo kuwa gatanu.
Minisitiri muri guverinema ihanganye n’iyemewe n’amahanga ikorera i Tripoli, Osama Hamad, yavuze ko “hahise hatangizwa iperereza kuri iki kibazo”. Mw’itangazo yagize ati: “Minisiteri y’ubutegetsi bw’igihugu, nayo irahakana yivuye inyuma, amakuru yasakaye kw’iyicwa rya Aldrasi”.
Mu kwezi kwa 7 umwaka wa 2019, depite Siham Sergewa n’umugabo we barashimuswe, bavanywe mu rugo rwabo i Bengazi. Kugeza ubu, bombi ntawe uzi irengero ryabo, kandi intumwa za ONU muri Libiya, zahamagariye irekurwa ryabo. (Reuters)
Forum