Abategetsi muri Afurika y’epfo, mu mujyi wa George, bahagaritse ibikorwa byo gushakisha ababa bararokotse, kandi kuri uyu wa gatanu, indi mirambo yabonetse, aho inyubako yahanutse igahitana abantu 33.
Abakozi b’ubutabazi n’abakorerabushake bari bamaze iminsi 11 bashakisha, nyuma y’uko inzu y’amagorofa atanu, yarimo kubakwa iguye mu mujyi wo mu burasirazuba bwa Cape Town, igasiga umukungugu mu kirere.
Guverinema y’intara ya Western Cape yavuze ko bikekwa ko abantu 62 ari bo bari bahari ubwo iyo nzu yahanukaga. Abantu 29 bararusimbutse, nyuma yo gutabarwa. Hari igihe abategetsi muri iyo ntara bigeze gutekerezaga ko abantu 81 ari bo bari bahari ubwo iyo nzu yagwaga.
Umutegetsi aho i Western Cape, Anton Bredell, yabwiye abanyamakuru ati: “Ubu nta n’inyoni ihatamba. Twakoze akazi kacu”. Birakekwa ko abimukira baturutse mu bihugu bituranyi, Malawi na Zimbabwe, bari aho iyo nzu yubakwaga kimwe n’abanyafurika y’epfo.
Umuvugizi wa minisiteri y’ububanyi n’amahanga ya Malawi, yavuze ko byemejwe ko abanyamalawi icyenda bahasize ubuzima kandi ko 11 batabawe. Babiri muri bo, baracyari mu bitaro.
Perezida w’Afurika y’epfo, Cyril Ramaphosa, kuri uyu wa kane, yasuye ahabeye iyo mpanuka kandi yabonanye n’imiryango yahuye n’ako kaga.
Icyatumye iyo nyubako igwa, nticyari cyamenyekana. Haracyakorwa amaperereza.
(Reuters)
Forum