Ishami rya ONU ryita ku buzima OMS, ryemeje urukingo ruheruka kuvugururwa rw’indwara ya korera rushobora gufasha guhangana n’ikibazo cy’umubare w’abarwayi wiyongera kw’isi hamwe n’icy’ibura ry’inkingo.
Umubare wiyongereye w’abarwayi n’ibura ry’inkingo byatumye ibihugu bikennye kurusha ibindi bitabasha guhangana n’ibyorezo bya korera.
OMS yatanze uruhushya rwo gukoresha urukiko rwakozwe n’isosiyete EuBiologics. Iyi yashinzwe mu mwaka wa 2010. Ifite icyicaro i Seoul muri Koreya y’epfo. Ni nayo yakoze urukingo rwari rusanzwe rukoreshwa kuri iyi ndwara ya korera.
Ubwoko bushya bw’uru rukingo, bwitwa Euvichol-S, rukoreshejwemo ibintu bike ugereranyije n’urusanzweho. Rurahendutse kandi rushobora gukorwa mu buryo bwihuse kurusha urwa mbere.
Uru rukingo rwerekanye ko rufasha gukumira indwara y’impiswi. Byagaragaye mu bushakashatsi bwimbitse bwakorewe muri Nepal.
Iyemezwa ry’uru rukingo na OMS, risobanuye ko imiryango itera inkunga mu birebana n’inkingo, nka Gavi na UNICEF, ubu noneho ishobora kurugurira ibihugu birushije ibindi gukena.
Leila Pakkala, umuyobozi w’ishami rishizwe kugeza inkingo ku bihugu wa UNICEF, mw’itangazo yavuze ko iri shami rya ONU noneho rizabasha kwongera umubare w’izo ryatangaga, ku gipimo kiri hejuru ya 25 kw’ijana.
Gavi igereranya ko hashobora kuzaboneka doze zigera muri miliyoni 50 zishobora gushyirwa hamwe uyu mwaka, ugereranyije na miliyoni 38 zo mu mwaka ushize.
Cyakora haracyari byinshi byo gukora. Kuva mu kwezi kwa mbere, ibihugu 14 byabayemo ibyorezo bya korera, byasabye doze miliyoni 79. Kugeza muri iki cyumweru, OMS ivuga hari doze miliyoni ebyiri n’ibihumbi magana atatu zishobora gukoreshwa.
Kuva mu kwezi kwa mbere gushize kandi OMS yatangaje ko abantu barenga 824.000 banduye korera. Harimo 5.900 bapfuye kw’isi hose. Umubare munini w’abarwayi wabonetse mu burasirazuba bwo hagati no muri Afurika.
OMS ivuga ko igipimo cy’ubushyuhe cyazamutse cyatumye bagiteri itera korera, ibasha kubaho igihe kirekire. Ibi nabyo byatumye ibyorezo birusho gukara, binongera umubare w’imfu, bitigeze bibaho mu myaka icumi ishize. (VOA News)
Forum